"İctimai Problemlərin Tədqiqi Assosiasiyası" (İPTA) İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Turizm sahəsində mövcud problemlərin aradan qaldırılması ilə bağlı görülən işlərə ictimai dəstəyin təşkili" adlı layihənin birinci mərhələsini yekunlaşdırıb. Layihənin birinci mərhələsində Azərbaycan Turizm və Menecment Universitetinin (ATMU) "Biznes idarəçiliyi","Turizm və qonaqpərvərlik" və "Xidmət mühəndisliyi" fakültələrinin müəllim və tələbə kollektivi ilə 8 seminar və rəy sorğuları keçirilib.
Tədbirlərdə Assosiasiyanın sədri t.ü.f.d., dosent Məhərrəm Zülfüqarlı, "Xidmət mühəndisliyi" fakültəsinin dekan müavini Anar Fərmayılov, "Biznes idarəçiliyi" fakültəsinin dekan müavini Anar Mirzəyev, "Marketinq" kafedrasının müdiri, i.ü.f.d., dosent Anar Eminov, "Turizm və qonaqpərvərlik" fakültəsinin dekanı c.ü.f.d., dosent Rəhman Səfərov və turizm sahəsində çalışan digər mütəxəssislər çıxış edib. Məruzəçilər turizm sahəsində mövcud olan problemlər - kadr, yüksək qiymət problemləri, turizmin əsasən mövsümi xarakter daşıması, regionlarda movcud olan məmur müdaxilələri, vergidən yayanma halları, ölkəyə gələn turistlərin statistikasında olan uyğunsuzluqlar və s. barədə ətraflı məlumatlar verib, problemlərin həlli ilə bağlı öz fikirlərini bölüşüb.
Layihənin növbəti mərhələsində seminarda səslənən fikirlər və 240 nəfər arasında aprılmış rəy sorğuları təhlil edilərək qruplaşdıralacaq. Daha sonra isə bu materiallar əsasında hesabat hazırlanaraq Şuraya təqdim olunacaq.
Məlumatı "İctimai Problemlərin Tədqiqi Assosiasiyası" (İPTA) İctimai Birliyinin mətbuat xidməti yayıb.
