Məlahət Mürşüdlü: "Şagird sıxlığı əsasən şəhərin mərkəzində olan məktəblərdə qeydə alınır"
Məktəblərdə sıxlıqla bağlı problemlərə hələ də rast gəlinir. Bu barədə Bakı Şəhəri üzrə Təhsil İdarəsinin müdiri Məhəbbət Vəliyeva media nümayəndələrinə açıqlamasında deyib. O bildirib ki, bu məsələ yalnız Təhsil Nazirliyinin problemi deyil, ümumiyyətlə, ərazidə məskunlaşma ilə əlaqəlidir.
M.Vəliyeva qeyd edib ki, sentyabr ayına qədər 8 məktəbdə təmir işləri başa çatacaq, əsaslı təmirdən sonra məktəblər istifadəyə veriləcək: "Amma 179 nömrəli məktəbin ərazisindəki sıxlıq hələ də davam etməkdədir. Artıq sıxlıq nəinki 179 nömrəli məktəbdə, eyni zamanda həmin ərazidə yeni, iki il əvvəl istifadəyə verilən 182 nömrəli məktəbdə də özünü göstərir. Binəqədi rayonu ərazisində yerləşən 205 nömrəli məktəbdə də sıxlıq müşahidə olunur. Bakı Şəhəri üzrə Təhsil İdarəsi məktəblərdə şagird sıxlığı ilə bağlı problemləri daim təhlil edərək Təhsil Nazirliyi qarşısında qaldırır, nazirlik də bu məsələni müvafiq qurumlara təqdim edir. Güman edirik ki, məsələ qısa müddətdə həllini tapacaq. Çünki məktəblərdə vəziyyət həqiqətən gərgindir".
Təhsil ekspertləri də Bakı məktəblərində sıxlığın yaşandığını təsdiqləyir.
Azad Müəllimlər Birliyinin rəhbəri Məlahət Mürşüdlü "Bakı-Xəbər"ə açıqlamasında qeyd etdi ki, məktəblərdə sıxlıq mövcuddur: "Bu problem şəhərin mərkəzi hissələrində daha çox qeydə alınır. Məktəblərdə sıxlıq əsasən birinci siniflərdə olur. Çünki valideynlər övladı üçün yaxşı məktəb və ya yaxşı müəllimin sinfi axtarışında olur. Nəticədə belə bir problem yaşanır. Mən sizə deyim ki, şagird sıxlığı problemi şəhərin kənar ərazilərində qeydə alınmır. Bunun da səbəbi bəzi valideynlərin övladını şəhər məktəbinə yazdırmasıdır. Valideyn işlədiyi əraziyə yaxın yerdə olan məktəbdə övladının təhsil alması üçün uşağı həmin tədris müəssisəsinə yazdırır".
Həmsöhbətimiz onu da vurğuladı ki, hansısa məktəbin təmir olunması səbəbindən şagirdlər müvəqqəti olaraq digər məktəblərdə oxumalı olur. Bu kimi səbəblərə görə məktəblərdə sıxlıq yaşanır.
Günel CƏLİLOVA
