Aytəkin Kamranqızı: "Beləliklə, fiziki qüsurlu şəxslər rahatlıqla heyvanlar aləmindən zövq ala biləcək"
Xəbər verildiyi kimi, Heydər Əliyev Fondunun vitse-prezidenti, İDEA İctimai Birliyinin təsisçisi və rəhbəri Leyla Əliyevanın təşəbbüsü ilə 80 ildən artıq fəaliyyətdə olan Bakı Zooloji Parkında yenidənqurma və bərpa işləri başlayır.
Qeyd edək ki, Bakı Zooloji Parkının təmiri ilə bağlı ətraf mühit və heyvanların qorunması üzrə fəaliyyəti ilə seçilən Leyla Əliyevaya şəhər sakinləri tərəfindən çoxsaylı müraciət ünvanlanıb. L.Əliyeva iyunun 28-də Bakı Zooloji Parkını bir daha ziyarət edərək buradakı mövcud vəziyyət və görüləcək işlərlə tanış olub.
Həyata keçiriləcək təmir-quruculuq tədbirləri çərçivəsində Zooloji Parkın ərazisinin genişləndirilməsi, ziyarətçilər üçün daha rahat məkana çevrilməsi, heyvanların saxlanma şəraitinin yaxşılaşdırılması və ərazidə müxtəlif əyləncə obyektlərinin istismara verilməsi nəzərdə tutulub.
Yenidənqurma işləri nəticəsində zoopark fiziki qüsurlu şəxslərin, həmçinin, bütün yaş qruplarından olan ziyarətçilərin rahatlıqla istirahət edəcəyi və maariflənəcəyi məkan olacaq.
Zooparkın fiziki qüsurlu insanların rahatlıqla istirahət edəcəyi bir məkana çevrilməsi sevindiricidir.
Sosioloq Aytəkin Kamranqızı bizimlə söhbətində bildirdi ki, zoopark hər kəsin sevdiyi istirahət məkanlarından biridir: "Lakin hamı burada istədiyi kimi əylənə bilmir. Səbəb isə fiziki qüsurlu insanların o məkana rahatlıqla daxil ola bilməməsidir. Əlil arabasında olan bir şəxs bu məkana çətinliklə daxil ola bilir. Onların rahatlığı üçün zooparkda ayrıca bir giriş olmalıdır. Beləliklə, fiziki qüsurlu şəxslər rahatlıqla heyvanlar aləmindən zövq ala biləcək. Fiziki qüsurlu insanların zooparka sərbəst şəkildə girişinin təmin olunması ilə bağlı L.Əliyevanın təşəbbüs göstərməsi sevindiricidir".
Həmsöhbətimizin sözlərinə görə, bütün yaş qruplarından olan insanların zooparka daxil ola bilməsi üçün şərait yaradılmalıdır. Tək cavanlar deyil, eyni zamanda yaşlı nəslin nümayəndələri də bu məkanın gözəlliyindən zövq almalıdır. Bunun üçün zooparkda yenidənqurma işlərinin aparılması təqdirəlayiqdir.
Günel CƏLİLOVA
