Son illər ölkəmizin bütün bölgələrində polis veteranlarının təcrübəsindən, bilik və bacarıqlarından daha geniş və səmərəli istifadə edilməsinin, onların ictimai təhlükəsizliyin təminində, cinayətlərin profilaktikası və açılmasında, təqsirləndirilən şəxslərin axtarışı tədbirlərinin planlaşdırılmasında, şəxsi heyətin təlim-tərbiyəsində, peşəkarlıqlarının artırılmasında, əhali arasında hüquqi biliklərin təbliğində fəaliyyətinin güclənməsinin şahidi oluruq. Qarşılıqlı əlaqələrimiz, işgüzar münasibətlərimiz daha da sıxlaşır.
Polisin fəaliyyətində əldə olunmuş qabaqcıl təcrübənin qorunub-saxlanması, daha da inkişaf etdirilməsi məqsədilə veteranların bilik və bacarığından istifadə olunmasına xüsusi əhəmiyyət verilir. Gənc əməkdaşların xalqımızın milli-mənəvi dəyərləri, vətənpərvərlik ruhunda tərbiyələnməsi, dünyagörüşünün formalaşması, multikultural dəyərlərə sadiq olması məqsədilə polis veteranlarının onlarla görüşü mütəmadi xarakter daşıyır. Eləcə də xidməti vəzifələrinin icrası zamanı qarşılaşdıqları çətinliklərin öhdəsindən gəlməkdə gənclərə yaxından kömək edirlər.
Polis veteranlarının təşkilatlanması, bilik və bacarıqları, peşəkarlıqları təmsil olunduqları ərazi polis orqanlarının və nizami hissələrin gündəlik işində də öz müsbət təsirini göstərməkdədir. Onların sıralarımızda olması, içdikləri anda sədaqətlə xidmət etməsinin nəticəsidir ki, ehtiyacı olan kimsədən köməklərini, bilik və bacarıqlarını əsirgəmirlər. Əksər ərazi polis orqanlarında veteranlar şuralarına xidməti otaqların ayrılması gənclik enerjisi ilə işləyən qocaman hüquqşünasların fəaliyyətini lazımi tələblər səviyyəsində qurmağa imkan verir.
DİN Veteranlar Şurasının üzvləri vaxtaşırı olaraq şəxsi heyət, ictimaiyyət arasında günümüzün aktual problemlərinə, mühüm tarixi hadisələrə, əlamətdar günlərə həsr olunmuş və hərbi-vətənpərvərlik mövzularında çıxışlar edir, söhbətlər aparır. Veteranlar vaxtaşırı görülən işlər barədə hesabat verir. Şuranın üzvləri qarşıya qoyulan vəzifələrin icrasında xüsusi fəallıq göstərir, vaxtaşırı təhsil müəssisələrində olur, ictimaiyyətin ayrı-ayrı təbəqələrini təmsil edən şəxslərlə görüşlərdə dini ekstremizmin, radikal cərəyanların, cəmiyyətin insanlıq əleyhinə cinayət, birgəyaşayış qaydalarına zidd olması, eləcə də narkotiklərin qanunsuz dövriyyəsinin zərəri, erkən nikahların fəsadları barədə ətraflı məlumat verir. Gənclərin vətənpərvərlik, milli-mənəvi dəyərlərimizə sədaqət ruhunda tərbiyəsinə xüsusi diqqət yetirilir.
Təkcə bir faktı qeyd etmək yerinə düşər ki, ötən il ərzində respublikanın ərazi polis orqanlarında veteranların iştirakı ilə dörd mindən çox cinayətin açılması təmin olunub. Onların təşəbbüsü ilə təhsil müəssisələrində, gənclər kollektivlərində 2100-ə yaxın tədbir keçirilib. Bu ilin birinci rübü ərzində isə onlar 1550 cinayət hadisəsinin açılmasında iştirak edib.
Respublikamızın müxtəlif bölgələrində onların iştirakı ilə orta məktəblərdə, lisey və gimnaziyalarda gənclərlə 980 görüş keçirilib.
Onlar ictimai fəaliyyətlərini, elm sahəsindəki araşdırmalarını daha da artırır. Bir sıra elmi araşdırmaların, tarixi kitabların müəllifi olan istefada olan polis polkovniki Georgi Zapletin çoxillik ədəbi fəaliyyətinin nəticəsi olaraq Yazıçılar Birliyinin üzvlüyünə qəbul olunub.
Onların əməyi daim diqqətdədir. Səmərəli fəaliyyətinə görə veteranlardan bir neçəsi DİN rəhbərliyi və Respublika Müharibə, Əmək və Silahlı Qüvvələr Veteranları Təşkilatı tərəfindən mükafatlandırılıb.
Fərhad Süleymanov, DİN Veteranlar Şurasının sədri, istefada olan polis polkovniki
