Məhərrəm Zülfüqarlı: "Diplomu olub işləməyən elm xadiminə maaş və ya mükafat verməkdənsə, işləyənləri diqqətdə saxlamaq lazımdır"
"Alimin işinə görə əlavə ödənişlərin verilməsi lazımdır". Bunu Milli Məclisin İctima birliklər və dini qurumlarla iş komitəsinin sədri Siyavuş Novruzov deyib.
O qeyd edib ki, institutlarda, universitetlərdə alimin hansısa təklifindən gəlir əldə olunursa, onun bir hissəsi alimə və AMEA-nın elmi-tədqiqat institutlarına verilməlidir: "Dövlət tərəfindən müəyyənləşdirilən ştat vahidi var. Olur ki, kimsə işləyir, digəri isə onun hesabına yaşayır. Hər bir alimin işinə görə əlavə ödənişlər verilməlidir. Hesab edirəm ki, Azərbaycanın gələcək iqtisadiyyatının elm əsasında qurulması istiqamətində nə qədər tez addım atılsa, o qədər çox qazanc əldə oluna bilər".
Alimin işinə görə əlavə ödənişlərin verilməsi məsələsi ilə bağlı fikir bildirən təhsil sahəsi üzrə ekspert Məhərrəm Zülfüqarlı "Bakı-Xəbər"ə açıqlamasında bunları qeyd etdi: "Elm xadimlərinin gördüyü işə görə mükafatlandırılması müsbət təklifdir. Bu gün bəziləri müdafiə edəndən sonra onlar diplomlarını alır və təbii ki, elmlər doktoru və ya professor adına sahib olur. Beləliklə, onlar heç bir elmi işlə məşğul olmur. Onların işi sanki bu ada sahib olmaq idi. Ancaq bir qisim elmi işçi isə elmi iş yazır və ondan əldə olunan gəlirə həmin iş görməyən alimlər şərik olur. Həmin alimlərin adları müəllif kimi qeyd olunur. Beləliklə, elmi iş yazan alimin gəliri bölünür. Bu isə düzgün deyil".
Həmsöhbətimiz hesab edir ki, diplomu olub işləməyən elm xadiminə maaş və ya mükafat verməkdənsə, işləyənləri diqqətdə saxlamaq lazımdır. Elmi iş görənlər, əsər yazanlara əlavə pul verilməlidir ki, elm daha da inkişaf etsin: "Elm üçün çalışanlara əlavə vəsait verilsə, gənclərin elmə marağı artar. Elmin inkişafı baxımından bu kimi tədbirlərin görülməsi vacibdir".
Günel CƏLİLOVA
