Lalə Əliyeva: "... dəri xəstəlikləri arasında ən çox yayılan göbələk xəstəliyinə tutula bilər"
Paytaxt küçələrində səyyar satışın artdığını istənilən şəxs müşahidə edə bilər. Şəhərin bəzi küçələrində səyyar satıcılar ərzaq məhsulları ilə yanaşı, geyim də satır. Geyimlər arasında uşaq paltarları, ayaqqabı və ən əsası alt paltarlarına rast gəlmək olar.
Qadın alt geyimlərinin səyyar şəkildə satılması həm alıcılar, həm də həkimlər tərəfindən məqbul sayılmır. Alıcılar bunun səyyar şəkildə satılmasının etik baxımdan düzgün olmadığını bildirir.
Onu da qeyd edək ki, bu cür geyimlərin səyyar şəkildə satılması gigiyenik baxımdan da düzgün deyil. Çünki açıq şəraitdə satılan geyim müxtəlif növ xəstəliklərə səbəb ola bilər.
Dermatoloq Lalə Əliyeva bizimlə söhbətində bildirdi ki, istənilən geyimin açıq şəkildə satılması düzgün deyil: "Xüsusilə bu alt paltarıdırsa. Nəzərə almaq lazımdır ki, alt paltarı dəri ilə təmasda olur. Belə olan halda, həmin geyim dəriyə infeksiya sala bilər. İstər səyyar şəkildə satılan geyim olsun, istərsə də kirayə və geyilmiş mal alan şəxs o paltarı üstündə bir dəfə yoxlamaqla belə xəstəliyə yoluxa bilər. Dəri xəstəlikləri arasında yayılmış olan göbələk xəstəlikləri daha tez yoluxdurulur. İnsanlar bu barədə ciddi düşünməlidir, dəri xəstəliklərinin yayılması tez baş verir və sağalması isə vaxt aparır. Həmçinin, səyyar şəkildə satılan alt paltarı vasitəsilə qadınlar müxtəlif növ ginekoloji xəstəliklərə tutula bilər. Müalicəvi dərmanlar isə çox bahadır. Bir sözlə, xüsusi paketləndirilmiş, səliqəli şəraitdə satılan təzə paltarı almaq daha məsləhətdir".
Həmsöhbətimizin sözlərinə görə, səyyar şəkildə satılan geyimlərin, xüsusilə alt geyimlərinin necə tikilməsi, hansı sexdə hazırlanıb satışa çıxarılması bəlli deyil: "Alıcı o paltarları almazdan öncə onların harada və hansı şəraitdə tikildiyini öyrənməlidir. Ola bilər ki, səyyar şəkildə satılan geyimlər ikinci əl geyimlərdir. İkinci əl geyimlərdə infeksiya daşıyıcılarının olması ictimaiyyətə bəllidir".
Dermatoloq bildirdi ki, səyyar şəkildə qadın və ya uşaq alt paltarlarının satışı qadağan olunmalıdır.
Günel CƏLİLOVA
