İlqar Hüseynli: "Bununla bağlı aparılan test imtahanları nə dərəcədə şəffaf olarsa..."
Dövlət orqanlarında aparat rəhbərləri, şöbə müdirləri kimi vəzifələrə qəbul test üsulu ilə olacaq. Qəbul da Dövlət İmtahan Mərkəzi tərəfindən aparılacaq. Qərar ali kateqoriyalı dövlət orqanları olan Prezident Administrasiyası, Nazirlər Kabineti, Milli Məclis, Konstitusiya Məhkəməsi, Ali Məhkəmə istisna olmaqla, digər qurumlara şamil olunacaq.
Testdən keçən namizədlər müsahibə mərhələsinə qatılacaq və uğur qazanacaqları təqdirdə müvafiq yerlərlə təmin olunacaq. Dövlət İmtahan Mərkəzinin Direktorlar Şurasının sədri Məleykə Abbaszadə müsahibəsində yaranan suallara, aparılan müzakirələrə aydınlıq gətirib. Qanunla heç kimin "gizlənpaç" oynaya bilməyəcəyini qeyd edən M.Abbaszadə bildirib ki, qanunda nə yazılıbsa, o da icra olunmalıdır. DİM rəhbəri vəzifələrin gizlədilməsinin də çətin olduğunu qeyd edib: "Biz artıq Dövlət Reyestri vasitəsilə dövlət orqanlarında olan vakant vəzifələri müəyyən edə bilirik, lakin həmin vəzifələrin tutulması ilə bağlı dövlət orqanının rəhbəri qərar verməlidir".
M.Abbaszadə elan olunmuş yüksək vəzifələrə təyinatın DİM xətti ilə bəzi hallarda aparılmayacağı ilə bağlı maraqlı məqama da toxunub: "Mərkəzi icra hakimiyyəti orqanlarında yüksək vəzifələrə qəbulun müsabiqə ilə keçirilməsi, həmin vəzifələr üzrə təyinatın müsabiqə əsasında aparılması nəzərdə tutulub. Lakin dövlət orqanlarının rəhbərləri işin dayanmaması üçün kimisə müəyyən vaxt ərzində (əsasən 3 ay müddətinə) müqavilə ilə işə cəlb edə bilər".
Ümumilikdə, belə bir qaydanın tətbiqi nə verəcək? Ekspertlərin buna münasibəti necədir? Məsələyə münasibət bildirən ekspert İlqar Hüseynli belə bir qaydanın tətbiq olunmasına müsbət prizmadan yanaşdı: "Sözügedən vəzifələrə təyinatların test üsulu ilə aparılması şəffaflığın təmin olunmasına gətirib çıxarır. Əvvəlki illərdə bu məsələdə əsasən tanışlıq rol oynayırdı. Bu zaman daha savadlı və bacarıqlı mütəxəssislər kənarda qalırdı. Nəticə etibarilə bu, professionallığın aşağı düşməsinə gətirib çıxarırdı. Çünki bəzi hallarda bacarığı olmayan insanlar müəyyən vəzifələrə təyin olunurdu. Bu da göstərilən xidmətin keyfiyyətinin aşağı düşməsinə gətirib çıxarırdı. Ona görə də bunun test üsulu ilə aparılması bu sahədə problemlərin həllinə müsbət təsir edə bilər. Bununla bağlı aparılan test imtahanları nə dərəcədə şəffaf olarsa, bu bir o qədər dövlət qulluğunda vəzifəli şəxslərin daha keyfiyyətli, daha bacarıqlı və təcrübəyə malik olan kadrlarla əvəz olunmasına gətirib çıxaracaq".
Vidadi ORDAHALLI
