Könül Vaqifqızı: "Boşanmaq istəyən ailələr öncə psixoloji müayinəyə göndərilir və psixoloji dəstək alan gənclər boşanmaq qərarını yenidən nəzərdən keçirir"
Azərbaycanda boşanmalara dair acınacaqlı statistika açıqlanıb. Dövlət Statistika Komitəsinin açıqladığı rəqəmlərə görə, 2016-cı ildə Azərbaycanda 13 114 boşanma qeydə alınıb. Bu da 2011-ci ildən sonra ən yüksək göstərici sayılır.
Son 6 ildə nikahların sayının ən çox qeydə alındığı 2011-ci ildə 88 145 evlənmə olub. Həmin ildə qeydə alınan boşanmaların sayı 10 747 olmaqla, son 6 ilin ən az göstəricisi qeydə alınıb. 2011-ci ildə əhalinin hər 1000 nəfərinə düşən nikahların sayı 9,7, boşanmaların sayı 1,2 olub.
2016-cı ildə isə əhalinin hər 1000 nəfərinə düşən nikahların sayı azalaraq 6,9-a enib, boşanmaların sayı isə artaraq 1,4-ə yüksəlib.
Boşanmaların sayının artması ölkə ictimaiyyətini ciddi şəkildə narahat edir.
Ekspertlər boşanmaların əsas səbəblərini müxtəlif cür izah edir. Onlar vəziyyətdən çıxış yolu üçün müəyyən təkliflər də irəli sürür.
Psixoloq Könül Vaqifqızı "Bakı-Xəbər"ə açıqlamasında qeyd etdi ki, boşanmaların əsas səbəbləri seksual uyğunsuzluq, məişət zorakılığı, tərəflərin bir-birini başa düşməməsi, iqtisadi və psixoloji çətinliklərdir: "Ancaq mən deyərdim ki, əsas səbəb seksual münasibətlərdir. Etiraf edək ki, bu gün Azərbaycanda kişi və ya qadının məhz bu səbəbə görə boşandığını etiraf etməkdən imtinasını görə bilərik. Məlumat üçün bildirim ki, dünya üzrə boşanmaların 50 faizdən çoxunun səbəbi məhz tərəflər arasında olan yaxınlıqdır. Azərbaycanda boşanan tərəflər heç vaxt bunu etiraf etmir. Nəticə etibarilə körpə dünyaya gəldikdən sonra tərəflər arasında seksual münasibətlərdə soyuma yaranır. Bu, Azərbaycan reallığıdır".
Həmsöhbətimizin sözlərinə görə, bu gün problemli ailələr də çoxdur: "Həmçinin yeni qurulan ailələrə müdaxilələrin çox olması da boşanmaya səbəb olur. Hazırda informasiya əsrində yaşayırıq. Bu da boşanmaların sayını artırır. Biri deyir ki, telefonunda mesaj tutdum, o biri deyir kiminləsə yazışdığını gördüm, digəri isə kiminsə şəklini bəyəndiyini gördüyünü bildirir".
K.Vaqifqızı qeyd etdi ki, boşanmaların səbəblərindən biri sosial-psixoloji şərtlərlə bağlıdır. Çünki ailə qurmaq ərəfəsində insanların bir-birini yaxından tanımaması, ailə qurduqdan sonra daha dərindən tanıması xarakterlərdəki uyğunsuzluğu üzə çıxarır. Digər amil isə sosial amildir. Adi bir iş yerinin bağlanması, iqtisadi problemlərin yaşanması ailə həyatına öz mənfi təsirini göstərir: "Elə ailələr var ki, onlar komfort yaşamaq istəyir. Zənginləşmək istəyi və ya "filan ailənin maddi durumu yüksəkdir, bizdə niyə aşağıdır" düşüncəsi ailədə narazılıq yaradır. Komfort yaşamaq istəyi ailə sütununu zədələyir".
Psixoloq boşanma hallarının aradan qaldırılması və ya azalması üçün bir sıra təkliflər irəli sürdü: "Boşanmadan əvvəl ailəyə psixoloji yardım olunmalıdır. Əksər ölkələrdə boşanmaq istəyənlər məcburi psixoloji müayinəyə göndərilir. Psixoloji dəstək alan gənclər boşanmaq qərarını yenidən nəzərdən keçirir. Azərbaycanda da bu təcrübədən istifadə edilməlidir".
Günel CƏLİLOVA
