İsmayıl Əhməd: "Rəsmi nikahı olmayan şəxslərə kəbin kəsən molla cəzalandırılmalıdır ki, bu, digərlərinə dərs olsun"
Aytəkin Kamranqızı: "Bu gün nikah olmadan dini kəbinlə ailə həyatı quran qızlarımız yetərincədir"
"Azərbaycanda rəsmi nikah olmadan dini nikahın bağlanması qanunsuzdur. Bunu edən din xadimi cəzalandırılacaq". Bunu Dini Qurumlarla İş üzrə Dövlət Komitəsinin sədri Mübariz Qurbanlı bildirib.
O qeyd edib ki, Azərbaycan dünyəvi ölkədir, nikah münasibətləri ilə bağlı müvafiq dövlət qurumu var: "Dini nikaha o zaman girmək olar ki, bu nikahı müvafiq dövlət qurumu təsdiqləmiş olsun. Bu qurumun təsdiqləmədiyi nikahı bağlayan din xadimi rəsmi təyin olunubsa, cəzalandırılacaq, tutduğu vəzifədən azad olunacaq. Əgər bunu edən din xadimi qeyri-rəsmi fəaliyyətlə məşğuldursa, hüquq-mühafizə orqanları tərəfindən məsuliyyətə cəlb ediləcək".
Rəsmi nikah olmadan dini kəbin kəsilməsinin düzgün olmadığını ekspertlər də təsdiqləyir.
İlahiyyatçı İsmayıl Əhməd bizimlə söhbətində bildirdi ki, Qafqaz Müsəlmanları İdarəsi əməkdaşlarına təlimat verib ki, din əmi və qardaşı qızının münasibətini kökündən qanunsuz hesab edir və bu münasibətin qurulması düzgün deyil: "Bu adamlara dini kəbin oxuna bilməz. Oxunsa belə, onun heç bir legitimliyi olmur, batil kəbindir. Qafqaz Müsəlmanları İdarəsi əməkdaşlarına təlimat verib ki, kəbin nikah haqqında şəhadətnamə əsasında oxunsun. Rəsmi nikahı olmayan şəxslərə kəbin kəsən molla cəzalandırılmalıdır ki, bu, digərlərinə dərs olsun".
Sosioloq Aytəkin Kamranqızının sözlərinə görə, rəsmi nikahı olmayan şəxslərə kəbin kəsilməsi düzgün deyil: "Bu gün nikah olmadan dini kəbinlə ailə həyatı quran qızlarımız yetərincədir. Əksər hallarda o qızların həyatı işıqlı olmur. Nəticədə onlar uşaqla işsiz, evsiz qalır. Onlar nikaha üstünlük versəydilər, bu gün o şəxslərin həyatı tam başqa cür olardı.
Bəllidir ki, bu gün erkən nikahları araşdıranda görürsən ki, ortada rəsmi nikah yoxdur, amma dini nikah, yəni kəbin kəsilib. Əslində, erkən evliliyin səbəbkarları da elə onlardır. 13-14 yaşlı qızların özündən 10 yaş böyük kişi ilə ailə qurmasına ilk növbədə elə dindarlar şərait yaradır. Qafqaz Müsəlmanları İdarəsi dəfələrlə xəbərdarlıq edib ki, rəsmi nikah olmadan dini kəbin kəsilə bilməz. Əvvəllər mollalar tərəfindən buna əhəmiyyət verilmirdi və onlar ailə qurmaq istəyənlərin yaxınları tərəfindən aldığı "şirinlik" müqabilində kəbin kəsirdi. Artıq buna yol verilməyəcək. Hansı molla və ya din xadimi bunu etsə, o müvafiq qaydada cəzalandırılacaq".
Günel CƏLİLOVA
