Bahadur Bilalov: "Vizanın 3 saat müddətində verilməsi onu göstərir ki, turizmin inkişafı ölkə Prezidenti tərəfindən prioritet sahə kimi qəbul olunur"
Prezident İlham Əliyev "ASAN Viza" sisteminin inkişafı və təkmilləşdirilməsi ilə bağlı əlavə tədbirlər və Azərbaycan Respublikası Prezidentinin 2016-cı il 20 oktyabr tarixli, 1082 nömrəli Fərmanı ilə təsdiq edilmiş "ASAN Viza" sistemi haqqında Əsasnamə"də dəyişikliklər edilməsi barədə Fərman imzalayıb.
Fərmana əsasən, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinə "ASAN Viza" sisteminin idarə edilməsi, inkişafı və təkmilləşdirilməsinin özünümaliyyələşdirmə mexanizmi çərçivəsində həyata keçirilməsi məqsədilə həmin sistemin dövlət-özəl tərəfdaşlığı prinsipi əsasında fəaliyyətini təmin etmək, əcnəbi və ya vətəndaşlığı olmayan şəxs Azərbaycan Respublikasına səfər etmək üçün elektron vizanın sürətləndirilmiş qaydada alınması ilə bağlı müraciət etdikdə belə müraciətlərə "ASAN Viza" sistemi vasitəsilə 3 saat ərzində baxılmasını təmin etmək, Azərbaycan Respublikası vətəndaşlarının xarici ölkələrə getməsi üçün zəruri vizaların "ASAN Viza" sistemi ("ASAN Viza 2.0") vasitəsilə alınmasını təmin etmək üçün təkliflər vermək, "ASAN Viza" sistemində bu fərmanda nəzərdə tutulan dəyişikliklərin aparılmasını təmin etmək tapşırılıb.
Məlumat üçün qeyd edək ki, Azərbaycanda ötən ildən "ASAN Viza" sistemi tətbiq olunur. Ötən müddət ərzində bu, turistlərin ölkəyə gəlməsinə müsbət təsir edib. Son yenilik bu istiqamətdə hansı müsbət nəticələrə gətirib çıxara bilər? Məsələyə münasibət bildirən turizm sahəsi üzrə ekspert Bahadur Bilalovun sözlərinə görə, bu qərar turistlərin ölkəyə gəlməsində vaxt itkisinin qarşısını alacaq: "Əvvəl bunun üçün bir neçə gün tələb olunurdu. Sistemə nəzarət edənlər sənədlərlə tanış olurdular və s. Bu da, təbii ki, vaxt itkisinə gətirib çıxarırdı. Ancaq müddətin 3 saata endirilməsi o deməkdir ki, vizanın verilməsi tamamilə sadələşib. Yəni üç saat ərzində ölkəyə gəlmək istəyən hə-yox cavabını ala biləcək. Bu da ölkəyə turist axınının artmasına səbəb olan bir məsələdir. Məsələn, turist görəndə ki, viza məsələsi ilə bağlı 2-3 gün vaxt lazımdır, bəziləri bunu gözləmək istəmir. O baxımdan vizanın 3 saat müddətində verilməsi onu göstərir ki, turizmin inkişafı ölkə Prezidenti tərəfindən prioritet sahə kimi qəbul olunur. Sadəcə olaraq, az-çox bu məsələyə aidiyyəti olan insanlar da bir məsuliyyət hissi daşımalıdır. Sərhəd-gömrük məntəqəsindən başlamış, hər bir turistlə qarşılaşan insanlar məsuliyyət hissi daşımalıdır ki, gələnlər bu ölkənin qonağıdır. Prezident çalışır ki, ölkəyə daha çox turist gəlsin. Çünki hər gələn turist ölkəyə əlavə valyuta axınıdır".
Vidadi ORDAHALLI
