Hacıəmi Atakişiyev: "Azərbaycan reklam bazarında yaşanan xaosun aradan qaldırılması..."
Xəbər verildiyi kimi, Prezident İlham Əliyev iyunun 20-də Azərbaycan Respublikasının Dövlət Reklam Agentliyinin yaradılması haqqında Fərman imzalayıb. Fərmana əsasən, ölkə ərazisində açıq məkanda reklam daşıyıcılarının yerləşdirilməsi, həmin reklam daşıyıcıları üzərində yerləşdirilməsi nəzərdə tutulan reklamların istehsalı (hazırlanması) və yayımlanması sahəsində vahid tənzimləməni və nəzarəti təmin etmək məqsədilə "Azərbaycan Respublikasının Dövlət Reklam Agentliyi" publik hüquqi şəxs yaradılıb.
Yeni yaradılan Dövlət Reklam Agentliyinin reklam sahəsinə nə kimi fayda verəcəyini öyrənmək məqsədilə Azərbaycan Reklamçılar İttifaqı İctimai Birliyinimn sədri Hacıəmi Atakişiyevlə danışdıq. H.Atakişiyev "Bakı-Xəbər"ə açıqlamasında qeyd etdi ki, bu günə qədər Azərbaycanın reklam bazarında xaos yaşanırdı: "Nə qiymət, nə də keyfiyyət sarıdan müsbət nəticə vardı. Reklam sahəsində yeganə təşkilat Bakı Şəhər İcra Hakimiyyətində reklam informasiya idarəsidir. Bu idarə istədiyi kimi işləyirdi. Nə reklam haqqında qanuna baxılırdı, nə də Nazirlər Kabinetinin göstərişlərinə. Bəllidir ki, küçədə açıq məkanda reklam yerləşdirmək olmaz. Açıq məkanda reklam yerləşdirməyin qarşısını həm qanun alır, həm də Nazirlər Kabinetinin qərarları. Hətta Nazirlər Kabinetinin qərarı var ki, küçədə yerləşdirilən reklam ləğv oluna bilər. Ancaq həmin idarə qanun və göstərişlərə riayət etmirdi. Bu səbəbdən də reklam sahəsi inkişaf edə bilmirdi. Reklam sahəsində yaranan vəziyyətin aradan qaldırılması istiqamətində irəliləyişə nail olunması məqsədilə Prezident İlham Əliyev tərəfindən Reklam Agentliyinin yaradılması haqqında qərar verildi".
Həmsöhbətimizin sözlərinə görə, Reklam Agentliyinin yaradılması vaxtında verilmiş qərardır: "Bu günə kimi biz reklamdan nə qədər vəsait itirmişik. Mən sizə deyim ki, Bakı Şəhər İcra Hakimiyyətində reklam informasiya idarəsinin küçə reklamlarından 1 milyon 250 min dövriyyəsi var. Ancaq Milli Məclisdə iştirak edən millət vəkilləri bildirirlər ki, Azərbaycanın reklam dövriyyəci 500 milyon təşkil edir. Bunun bir hissəsini televiziya və Kütləvi İnformasiya Vasitələrinə çıxanda 200-250 milyon vəsait qalmalıdır. Ancaq idarə dövriyyəsinin 1 milyon 250 min olduğunu göstərir. Nə qədər fərqin olduğu göz qabağındadır. Fərqin aradan götürülməsi üçün Reklam Agentliyi yaradıldı. Belə bir Agentliyin yaradılması düzgün addımdır. Bundan sonra reklam sahəsi bütün respublika üzrə yalnız Reklam Agentliyi tərəfindən idarə olunacaq".
Günel CƏLİLOVA
