Fazil Mustafa: "Tanınmış insanlar bu cür təhqiramiz ifadələr seçməkdən uzaq durmağa çalışmalıdır" Şahin Camalov: "Hər kəs ictimai asayişi qoruyan polis əməkdaşlarına hörmət etməlidir"
Azərbaycanlı müğənni Nigar Camal Dövlət Yol Polisinin əməkdaşlarından narazılığını sosial şəbəkə vasitəsilə ictimaiyyətə çatdırıb.
"Eurovision" mahnı müsabiqəsinin qalibi sosial şəbəkədə bu sözləri yazıb: "DYP axır zamanlar çox qudurub! Daha susmaq istəmirəm. İdeal olmasa da, mən həmişə qaydalara əməl etməyə çalışıram. Qaydanı da pozanda deyirəm ki, cəriməmi yazın. Sənədlərim də həmişə qaydasında olur. Amma bütün bunlara bizim DYP əhəmiyyət vermir. Onlar yollarda təhlükəsizliyi təmin etmək əvəzinə, özləri qaydaları pozurlar. Düz getdiyin yolda səni səbəbsiz yerə saxlayırlar. Xüsusilə axşam saatlarında, ümumiyyətlə, maşın sürmək mümkün deyil. Yolda "inomarka" görən kimi arxasınca sürüb saxlatdırırlar. İlk olaraq, kobud tonda kəmərə ilişir. Sonra da alkoqola. Əmin edirsən ki, alkoqol qəbul etməmisən, sənədlərin də qaydasındadır. Belə olanda da deyirlər ki, sizin bir cəriməniz var, maşınınızı cərimə meydançasına götürməliyik. "Cərimənizi ödəyin" demək əvəzinə, maşını aparmaq, sürücülük vəsiqəsini almaq istəyirlər. Mənim sürücülük vəsiqəm Böyük Britaniyaya aiddir, alsan nə olacaq ki? Sadəcə, 20 dəqiqə yolda vaxt itirirsən.
Səhər yenə saxlayırlar. Düşündük ki, yenə kəmərə ilişəcəklər. Amma bu dəfə qəsdən deyir ki, telefonla danışırdınız. Soruşuram ki, siz telefonu harda gördünüz? Deyir ki, əlinizdə tutmusunuz. Telefonun arxa oturacaqda çantamda olduğunu göstərirəm. Çarəsiz qalanda da deyir ki, bəs siz polisin "saxla" əmrinə vaxtında əməl etməmisiniz. Kəmər, telefon, indi də sizin "müqəddəs taxta"nız? İzah edirəm ki, yolda maşın onsuz da çoxdur, mən diqqətimi sizin sifətinizə yox, yola yönəltməyə çalışıram. 100 manat cərimə yazmaq istəyəndə də deyirəm ki, bayaqdan sizi kamera çəkirdi. Bunu eşidən kimi dərhal danışıq tonu dəyişdi, üzündə gülüş, zarafat. Məni də xoşluqla buraxdılar".
N.Camalın yol polisləri haqqında səsləndirdiyi fikirlər ölkə ictimaiyyəti tərəfindən birmənalı qarşılanmayıb. Müğənni dediyi kimi hal baş veribsə, yaxşı olardı ki, yaranan vəziyyətlə bağlı Dövlət Yol Polisi İdarəsinə müraciət edərdi. Onlar vəziyyəti yerindəcə araşdırıb kimin haqlı, kimin haqsız olduğunu deyərdilər. Ancaq ümumi polisi ittiham etmək düzgün deyil. Ekspertlər bu halı Azərbaycan polisinə qarşı hörmətsizlik kimi qəbul edir.
Millət vəkili Fazil Mustafa müğənni N.Camalı türkiyəli futbolçu Arda Turanla müqayisə etdi. Millət vəkili qeyd etdi ki, A.Turan Makedoniya ilə oyundan qayıdarkən təyyarədə ailəsi barədə yazı yazmış Bilal Meşe ilə dava edib və onu vurmağa çalışıb: "Avroviziya-2011"in qalibi N.Camal isə maşınını saxlayan yol polisi ilə bağlı sosial şəbəkədə fikirlərini yazıb və bu zaman təhqiramiz fikirlər səsləndirib. Türkiyənin həqiqətən istedadlı futbolçularından biri olan Arda Turan əleyhinə yazı yazmış yaşlı bir jurnalistə əl qaldırmaqla xeyli nüfuz itirdi. Kim olursan-ol, elə davranışlar var ki, cəmiyyət onu sənin hansısa xidmətlərinə də bağışlamır. Olmaz. Tərbiyəli olmağa məhkumsan. Xüsusilə də cəmiyyətin sevdiyi, insanların simpatiyasını qazanan bir insansansa, xüsusilə diqqətli olmalısan. İndi baxıram ki, bizdə də N.Camal adlı bir "Avroviziya" qalibi narazı qaldığı yol polisləri haqqında təhqiramiz ifadə işlədib. Anlayıram, polislərin davranışında, rəftarında hüquqa uyğun olmayan epizodlar ola bilər, xanımı haqsız yerə maşınını saxlamaqla əsəbləşdirə də bilərlər, ancaq bunun qarşılığı 102-yə zəng edərək həmin polisin rəftarı barədə bilgi verməkdir. Ölçü götürülmədiyi halda yenə də etik çərçivəni aşmadan neqativ əməl sahibi olan polisin davranışı barədə fikirlərini ictimaiyyətə çatdıra bilərsən. Yoxsa mən bir beynəlxalq yarışın qalibiyəm deyə yol polisinə yönəlik "qudurublar!" ifadəsini yazmaq və paylaşmaq heç bir ədəb ölçüsünə uyğun gəlmir. Əslində, bu ifadəni ancaq nəyəsə, kiməsə arxayın olan adamlar belə rahatlıqla, məsuliyyətsiz formada işlədə bilər. Nə olur-olsun, tanınmış insanlar bu cür təhqiramiz ifadələr seçməkdən uzaq durmağa çalışmalıdır".
"Təhlükəsiz Yol" Alyansının koordinatoru Şahin Camalov bizimlə söhbətində bildirdi ki, kimliyindən, tutduğu vəzifəsindən asılı olmayaraq, kiminsə polis və ya başqa bir sahədə çalışan şəxslər haqqında qeyri-etik ifadələr işlətməsi düzgün deyil: "Müğənni N.Camalın fikirlərini oxudum. O, məlum məsələ ilə bağlı ümumi danışıb. Hər hansı bir fakt varsa, bu araşdırılmalıdır. Lap bir fakt olsa belə, onun ümumi polislərə ünvanlanması düzgün deyil. Ancaq müğənninin kobud danışması və polisləri nədəsə ittiham etməsi yaxşı hal deyil. Kimliyindən asılı olmayaraq, hər kəs ictimai asayişi qoruyan polis əməkdaşlarına hörmət etməlidir. Yoxsa, onlar barəsində təhqiredici fikirlər söyləmək qeyri-etikdir". Günel CƏLİLOVA
