Nadir İsrafilov: "Yeni tikiləcək binaların alt mərtəbələri məktəbəqədər təhsil müəssisələri üçün nəzərdə tutulacaq"
Prezident İlham Əliyev "Məktəbəqədər təhsil haqqında" Azərbaycan Respublikasının 2017-ci il 14 aprel tarixli, 585-VQ nömrəli Qanununun tətbiqi barədə Fərman imzalayıb. Belə ki, qanunda qeyd olunur ki, Nazirlər Kabineti tərəfindən sağlamlıq imkanları məhdud olan məktəbəqədər yaşlı uşaqların təhsilinin dövlət standartları, ailə tipli, icma əsaslı, qısamüddətli təlim qruplarında məktəbəqədər təhsilin təşkili, məktəbəqədər təhsil müəssisəsində əlavə müayinə və müalicəyə ehtiyacı olan uşaqlara əlavə müalicə-bərpa xidməti göstərilməsi qaydaları müəyyən ediləcək.
Məsələ barədə fikir bildirən təhsil eksperti Nadir İsrafilov "Bakı-Xəbər"ə açıqlamasında qeyd etdi ki, təhsilin ən axsayan sahələrindən biri məktəbəqədər təhsildir: "Bəllidir ki, təhsilə qayğı Dövlət Strategiyasında prioritet istiqamətlərdən biri kimi qeyd olunub. Məktəbəqədər hazırlıq əsasən uşaq bağçalarında aparılır. Uşaq bağçalarının sayı yetərli olmadığı üçün, uşaqların məktəbəqədərki hazırlığı məktəblərdə də aparılır. Bu səbəbdən də məsələnin həlli yolu gündəmə gəldi. Məktəbəqədər təhsillə bağlı vəziyyətin ürəkaçan olmaması Dövlət Strategiyasında da qeyd olunub. Məlumat üçün bildirim ki, 1990-cı illərin əvvəllərindən etibarən bu sahədə boşluq yarandı. Həmin ərəfədə 300-ə qədər məktəbəqədər təhsil müəssisəsi özəlləşdirilməyə çıxarıldı. Özəlləşdirilmə nəticəsində həmin müəssisələrin əksəriyyətinin təyinatı dəyişdirildi. Təhsil müəssisələri gözəllik salonları və ya şadlıq sarayları ilə əvəz olundu. Bu vəziyyətdən qurtulmaq üçün məktəbəqədər hazırlıqla bağlı qanun qəbul olundu. Həmçinin, bu sahədə olan boşluğu aradan qaldırmaq üçün Prezident tərəfindən növbəti sərəncam imzalanıb. Həmin sərəncama əsasən, yeni tikiləcək binaların alt mərtəbələri məktəbəqədər təhsil müəssisələri üçün nəzərdə tutulacaq".
Həmsöhbətimizin sözlərinə görə, məktəbəqədər tərbiyə, təhsil təməl təhsilidir. Təhsilin keyfiyyət sarıdan müəyyən problemlər yaşamasının səbəbi həmin təməlin zəif qurulmasıdır: "Elə ölkələr var ki, onlar 100 faiz məktəbəqədər təhsillə təmin olunub. Bizdə isə bu rəqəm 14 faizdir. Dünya ölkələri ilə müqayisədə çox geridəyik. Vəziyyət kritik olduğu üçün, məsələ ölkə başçısı səviyyəsində qaldırılıb: "Ölkə başçısı İlham Əliyevin məktəbəqədər təhsilin tətbiqi haqqında fərman imzalaması təqdirəlayiqdir". Günel CƏLİLOVA
