Fatimə Hacıbəyli: "Təəssüf ki, bu gün bəzi müğənnilər tərəfindən nikahdan kənar uşaqların dünyaya gətirilməsi təqdir olunur"
Azərbaycanda son 4 ildə ilk dəfə olaraq qeyri-rəsmi nikahdan doğulan uşaqların sayı yenidən ən yüksək səviyyəyə çatıb. Rəsmi qeydiyyata alınmamış nikahda olan qadınlar tərəfindən 2012-ci ildə 27 031 uşaq dünyaya gətirilib. Lakin 2013-cü ildən başlayaraq bu say azalmağa dorğu dəyişib. Belə ki, rəsmi qeydiyyata alınmamış nikahda olan qadınlar tərəfindən 2013-cü ildə 25 069, 2014-cü ildə 25 486, 2015-ci ildə 24 038, 2016-cı ildə 26 288 uşaq doğulub.
Rəsmi qeydiyyata alınmamış nikahda doğulan uşaqların sayı ölkədə diri doğulanların ümumi sayına olan nisbətdə də artıb.
2013-cü ildə qeyri-rəsmi nikahdan doğulan uşaqların sayının ölkədə diri doğulanların ümumi sayına olan nisbəti 14,5 faiz olduğu halda, 2016-cı ildə bu rəqəm 16,5 faiz olub.
Qeyri-rəsmi nikahdan doğulan uşaqların sayının artması ölkə ictimaiyyətini də narahat edir. Ekspertlər nikahdan kənar uşaqların sayının artmasını müxtəlif cür izah edir.
"Vəfa" Sosial İctimai Birliyinin sədri Fatimə Hacıbəyli "Bakı-Xəbər"ə açıqlamasında qeyd etdi ki, qeyri-rəsmi nikahdan doğulan uşaqların sayının artması təəssüf doğurur: "Sayın artması ilk növbədə nikahın bağlanmaması ilə bağlıdır. Elə ailələr var ki, nikah bağlanmayıb və nəticədə o tip ailələrin dünyaya gətirdiyi uşaqlar nikahdan kənar doğulan uşaq hesab olunur.
Həmçinin onu da deyim ki, bu gün bəzi müğənnilər tərəfindən nikahdan kənar uşaqların dünyaya gətirilməsi təqdir olunur. O müğənnilər qeyri-rəsmi yaşadıqları şəxsdən uşaq dünyaya gətirir və bunu açıq-aşkar ictimaiyyətə bəlli edir. Təəssüf ki, bəzi qızlar o müğənnilərin yolu ilə gedir".
Həmsöhbətimiz onu da əlavə etdi ki, qeyri-rəsmi nikahlar əsasən yetkinlik yaşına çatmayanlar ailə qurduqda yaranır: "Bu iş yetkinlik yaşına çatan insanların da başına gəlirsə, bu onların hüquqlarından xəbərsiz olduğu deməkdir. O cür insanlar ayrıldıqdan sonra potensial insan alveri qurbanlarına çevrilə bilər. Çünki atalığın müəyyən olunması uzun və bahalı prosesdir. Əksər hallarda çox qadının buna imkanı çatmır. Bu problemlə üzləşmiş qadınların çoxunun gedəcək yeri olmur deyə, çıxılmaz vəziyyət yaranır".
Günel CƏLİLOVA
