Bahadur Bilalov: "Rusiyada vəziyyətin o qədər də ürəkaçan olmaması adıçəkilən ölkəyə səfər edən turist sayına təsir edir"
Ötən illə müqayisədə Rusiyaya səfər edən azərbaycanlı turistlərin sayı azalıb. "TurStat" agentliyi 2017-ci ilin ilk rübündə Rusiyaya daxil olan turistlərin statistikasını araşdırıb. Məlum olub ki, cari ilin ilk üç ayında Azərbaycandan Rusiyaya 181 min turist səfər edib ki, bu da 2016-cı ilin analoji dövrü ilə müqayisədə 16 faiz azdır.
Ümumilikdə, 2016-cı ilin ilk üç ayı ilə müqayisədə 2017-ci ilin birinci rübündə Rusiyaya turist axını 2,5 % azalıb.
Bu müddət ərzində Rusiyaya ən çox turist Ukraynadan gəlib - 1578000.
Rusiyaya səfər edən azərbaycanlı turistlərin sayının azalmasını ekspertlər müxtəlif cür izah edir. Onların fikrincə, azərbaycanlı turistlər artıq səfalı bölgələrimizə üz tutmağa daha çox üstünlük verir. Həmçinin, yerli vətəndaşların Gürcüstana olan marağı statistikaya öz təsirini göstərir.
Məsələ ilə bağlı fikir bildirən turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, manatın xarici valyutaya nisbətən məzənnəsinin dəyişməsindən sonra xaricə gedənlərin sayında azalma müşahidə olunur. Yerli vətəndaşlar daha çox ölkə daxilində səyahətə üstünlük verir.
Həmsöhbətimiz onu da vurğuladı ki, Rusiyada vəziyyətin o qədər də ürəkaçan olmaması turist sayına təsir edir: "Rusiyada sabitliyin olmaması, mitinqlər və digər hadisələr turist axınının zəifləməsinə səbəb olur. Bəllidir ki, insanlar daha çox sabitliyi olan ölkəyə maraq göstərir. Bu baxımdan Gürcüstan daha cəlbedici görsənir. Gürcüstanın yaxın olması azərbaycanlı turistlərə sərf edir. Etiraf edək ki, vətəndaşlarımız Gürcüstanda 4-5 ulduzlu otellərdə deyil, evlərdə daha çox qalır. Azərbaycanlı turistlərin evlərdə qalması halı daha çox vüsət alıb. Ucuz qiymətə gecələmə yerinin Gürcüstanda çox olması həmin ölkəyə gələn turistlərin sayına təsir göstərir. Hesab edirəm ki, bu il də Gürcüstana səfər edəcək azərbaycanlıların sayı ötən ildən az olmayacaq".
Günel CƏLİLOVA
