“Azərbaycanda ali təhsil müəssisələrində kredit sistemi ilə tədrisin təşkili qaydalarına dəyişikliklər edilib”. APA-nın xəbərinə görə, bu barədə Təhsil Nazirliyində keçirilən brifinqdə nazirliyin aparat rəhbərinin müavini, Elm, ali və orta ixtisas təhsili şöbəsinin müdiri Yaqub Piriyev deyib. O bildirib ki, Təhsil Nazirliyində Nazirlər Kabinetinin qərarına əsasən, “Ali təhsil müəssisələrinin bakalavriat və magistratura səviyyələrində və Azərbaycan Milli Elmlər Akademiyasının magistratura səviyyəsində kredit sistemi ilə tədrisin təşkili Qaydaları”nın təsdiq edilməsi haqqında” 2013-cü il 24 dekabr tarixli qərar dəyişdirilib.
Dəyişikliklərə əsasən, akademik borcu olan tələbələrə hər semestrdə ümumilikdə iki fənn üzrə fənni dinləmədən kreditləri qazanmaq (imtahanda iştirak etmək) imkanı yaradılıb: " Üzrlü səbəbdən imtahanda iştirak etməyən tələbə həmin fənn üzrə təkrar imtahan üçün ödəniş etmir. Digər tələbələr isə imtahanda iştiraka görə həmin fənn üçün nəzərdə tutulan məbləğin 25 faizindən çox olmamaq şərtilə ali təhsil müəssisəsi tərəfindən müəyyənləşdirilən vəsaiti ödəyəcək. Hazırda dövlət ali təhsil müəssisələrində sonuncu buraxılış kursunun tələbələrinin 6 faizə qədərini 1-2 fəndən akademik borcu qalıb. Dəyişikliklərə görə, bir semestrdə tələbənin götürdüyü kreditlərin maksimal sayı 38-dən 40-a, yay semestrində tələbənin götürdüyü fənlər üzrə kreditlərin cəminin sayı isə 9-dan 10-a qədər artırılıb".
Y. Piriyev deyib ki, əyani təhsilalma formasının yeni növləri - tədrisə tam cəlb olunma və tədrisə qismən cəlb olunma növləri tətbiq edilib. Tədrisə tam cəlb olunma - ixtisasın təhsil proqramı ilə müəyyənləşmiş normativ təhsil müddətinə uyğun, tədris qrafiki ali təhsil müəssisəsi tərəfindən planlaşdırılan, tədrisə qismən cəlb olunma isə – ixtisasın tədris planına uyğun, hər semestrdə iki fəndən az olmamaqla, tədris qrafiki tələbə tərəfindən planlaşdırılan əyani təhsilalma formasının növüdür. Tədrisə qismən cəlb olunma növünün tətbiqi aztəminatlı ailələrindən olan tələbələrə işləmək, işləyən şəxslərə isə təhsil almaq imkanı yaradacaq.
“Bu ildən ali məktəblərdə 1 və ya 2 akademik borcu olan oğlan tələbələrin hərbi xidmətlə bağlı yaranan problemləri həll olunacaq” – deyən Y.Piriyev bildirib ki, əvvəllər oğlan tələbələrin tədris müddətində akademik borcları qalırdısa, onlar həmin borcu hərbi xidmətdən sonra vermək məcburiyyətində qalırdı.
Onun sözlərinə görə, artıq oğlan tələbələr yeni qaydalara əsasən imtahan sessiyası başa çatandan sonra 1-2 fənn üzrə akademik borcunu ödəyib əsgərliyə gedə biləcəklər: “5 iyula kimi ali məktəblərdə sessiyalar davam edir. Həmin tələbələrə imkan yaradılacaq ki, akademik borclarını ləğv etsinlər. Lakin bu, yalnız 1 və ya 2 akademik borcu olanlara aiddir. Bundan sonra tələbələrə imkan yaradılacaq ki, dövlət imtahanı versin, buraxılış işlərini müdafiə etsin, akademik borclarını ləğv edib hərbi xidmətə yollansın”.
Nazirlik rəsmisi qeyd edib ki, bu gün nazirlikdə prorektorların iştirakı ilə iclas keçiriləcək və müvafiq göstəriş veriləcək.
Y. Piriyevin sözlərinə görə, bu gün IV kursu bitirən 2000-ə yaxın tələbə var. Aparılan araşdırmalara görə, ali təhsil müəssisəsini bitirənlərin təxminən 6%-nin 1 və ya 2 akademik borcu var.
