Yeniyetmə və gənclər arasında antinarkotik təbliğatın güclənməsi, dini radikalizmə qarşı mübarizə, azyaşlılar arasında erkən nikah və intihar hallarının qarşısının alınması məqsədilə polis şöbələri rəhbərliyi və aidiyyəti xidmət əməkdaşları polis veteranları ilə birgə ayrı-ayrı təhsil müəssisələrində, iş yerlərində yeniyetmə və gənclərlə görüşlər keçirərək hüquqi mövzularda maarifləndirmə işləri aparırlar.
Cəmiyyətdə "Ağ ölüm" kimi tanınan narkomaniya insan həyatına sağalmaz yaralar vurur. Bu bəladan xilas olmaq üçün təkcə maarifləndirmə kifayət etmir. Xüsusən yeniyetmə və gənclər arasında geniş təbliğat işləri aparılmalıdır. Bu məqsədlə Nərimanov RPİ-nin Veteranlar Şurasının təşəbbüsü ilə 45 nömrəli orta məktəbdə "Narkomaniya ümumbəşəri bəladır" mövzusunda tədbir keçirilib.
Tədbiri Nərimanov RPİ-nin Polis Veteranlar Şurasının sədri Paşa Kərimov açaraq bildirib ki, narkomaniya və onun törətdiyi faciələr haqqında hər bir gənc, xüsusən də məktəblilər geniş məlumata malik olmalıdır.
Daha sonra RPİ-nin Yetkinlik Yaşına Çatmayanlarla Profilaktiki İşin Təşkili Bölməsinin rəisi, polis mayoru Rüstəm Rüstəmov çıxış edərək, gənclərimizin bu mövzuda maarifləndirilməsində, bu bəlaya qarşı təbliğatın gücləndirilməsində ümumtəhsil məktəblərinin rolunun böyük olduğunu diqqətə çatdırıb.
Tədbirdə iştirak edən müəllim və şagirdlərlə yetkinlik yaşına çatmayanların inzibati və cinayət qanunvericiliyində nəzərdə tutulmuş məsuliyyəti, eyni zamanda yetkinlik yaşına çatmayanların hüquq və vəzifələri aspektində diskussiya xarakterli məqsədyönlü, qabaqlayıcı ümumi profilaktik söhbətlər aparılıb.
Görüşün yekununda mövzu ilə bağlı 25 dəqiqəlik videoçarx nümayiş olunub.
Zeyni Hüseynov, DİN mətbuat xidmətinin əməkdaşı
