102 saylı orta məktəb - Sənubər müəllimə: "Son zəng", digər məktəblərdən fərqli olaraq, bizdə vətənpərvərlik mövzusunda keçirildi"
29 saylı orta məktəb - Safura Hüseynova: "Son zəng" tədbiri məktəblilərin müxtəlif formatlı iştirakı ilə keçirilib"
Orta məktəbi bitirən hər bir şagird üçün ən önəmli tədbir onun ömrünün qayğısız illərini yaşadığı məktəbi ilə vidalaşdığı gündür. Azərbaycanda, ənənəvi olaraq, buraxılış siniflərinin şagirdləri və məktəb kollektivləri "Son zəng" tədbirinin baxımlı olmasına çalışır.
Məlumat üçün bildirək ki, bu il Azərbaycanın ümumtəhsil məktəblərini 195 min 449 şagird bitirəcək. 9-cu sinifləri 110 min 638, 11-ci sinifləri 84 min 88, qiyabi ümumtəhsil məktəblərini isə 723 şagirdin bitirəcəyi gözlənir. 2016-2017-ci tədris ilində təkcə paytaxtda Bakı Şəhər Təhsil İdarəsinin tabeliyindəki ümumtəhsil məktəblərində buraxılış siniflərini 20 min 124 şagird bitirəcək.
Orta məktəbi bitirən hər bir məzun üçün "Son zəng" günü onlar xatirəsində bir iz qoyur. Bütün məktəblər "Son zəng" tədbirinə xüsusi hazırlaşır. Adətən tədris müəssisələrində bu tədbir rəsmi və qeyri-rəsmi hissədən ibarət olur. Rəsmi hissə məktəb daxilində olur, qeyri-rəsmi hissədə isə məzunlar ya restoranların birində, ya da Dənizkənarı Milli Parkda əylənərək tədris ilinin sonuncu gününü qeyd edir.
Paytaxt məktəblərində "Son zəng" gününün necə keçirildiyini öyrənmək məqsədilə araşdırma apardıq.
Xətai rayonu ərazisində olan 29 saylı orta məktəbdə "Son zəng" yalnız rəsmi hissədən ibarət olub. Məktəbin direktor müavini Safura Hüseynova "Bakı-Xəbər"ə açıqlamasında qeyd etdi ki, "Son zəng" çalışdığı məktəbdə möhtəşəm şəkildə keçirildi: "Tədbir yalnız məktəb daxilində oldu. Məktəbdən kənarda heç bir tədbir və ya şəhər gəzintisi olmayacaq. Buna məktəb rəhbərliyi icazə vermir, nə də ki, mən razı deyiləm. Qeyd etdiyim kimi, "Son zəng" mərasimi uğurla başa çatdı. Tədbir məktəblilərin müxtəlif formatlı iştirakı ilə keçirilib. Məktəbi bu il bitirən və tədrisini davam etdirən şagirdlərimiz çıxış etdilər. Muğam oxundu, milli rəqslərimiz göstərildi, həmçinin, XI-ci sinfi bitirən şagirdlər flaş-mob da göstərdilər. XI-ci sinfi bitirənlərlə yanaşı, IV sinfi bitirənlərin də son zəngi idi. Onlar ibtidai təhsildən ayrılırdı".
102 saylı orta məktəbin direktor köməkçisi Sənubər müəllimə də "Son zəng" tədbirinin yaxşı keçdiyini dilə gətirdi. O qeyd etdi ki, tədbir yalnız rəsmi hissə ilə yekunlaşıb: "Son zəng", digər məktəblərdən fərqli olaraq, bizdə vətənpərvərlik mövzusunda keçirildi. Tədbirdə iştirak edən məktəblilərin ifa etdikləri mahnılar daha çox vətənpərvərlik ruhunda idi".
Günel CƏLİLOVA
-ansi-language:AZ-LATIN;mso-fareast-language: RU'>Məhəmmədəli QƏRİBLİ
