Sahib Məmmədov: "Ötən il bu sahədə müəyyən qədər ölüm hallarının artması qrup halında baş verən hadisələrlə bağlıdır"
2016-cı ildə Əmək və Əhalinin Sosial Müdafiəsi Nazirliyi istehsalatla əlaqəli sayılmış 159 bədbəxt hadisənin təhqiqatını aparıb. Əmək və Əhalinin Sosial Müdafiəsi Nazirliyindən verilən məlumata görə, bu hadisələrdən 16-sı qrup halında baş verib. İstehsalatla əlaqəli hadisələr nəticəsində 84 nəfər həyatını itirib, 165 nəfər isə müxtəlif dərəcəli bədən xəsarəti alıb.
Nazirliyin açıqlamasına görə, iqtisadi fəaliyyət sahələri üzrə istehsalatla bağlı bədbəxt hadisələr daha çox tikinti sektorunda (24,2 %) qeydə alınıb: "Emal sənayesində (16,8 %), nəqliyyat sektorunda (12,4 %), mədənçıxarma sektorunda (14,9 %), energetika sahəsində (6,8 %) və digər sahələrdə (24,9 %) baş verməsi müəyyən edilib. Tikinti sektorunda 39 bədbəxt hadisə baş verib (onlardan qrup halında bir hadisə qeydə alınıb) və bu hadisələr zamanı ölənlərin sayı 10 nəfər, xəsarət alanların sayı isə 30 nəfər olub".
Bundan əlavə, 2015-ci ilin dekabr ayında Xəzər dənizində baş vermiş təbii fəlakət nəticəsində SOCAR-ın Nəqliyyat İdarəsinin 5 saylı Texnoloji Nəqliyyat Departamentinin 3 nəfər işçisinin ölümü və SOCAR-ın Günəşli yatağının 10 saylı stasionar dərin dəniz özülündə 30 nəfərin ölümü, 33 nəfərin itkin düşməsi və xeyli sayda işçinin xəsarət alması ilə nəticələnmiş bədbəxt hadisənin təhqiqatına 2015-ci ildə başlanıb və bu təhqiqatlar 2016-cı ildə başa çatdırılıb.
Bütövlükdə, götürəndə əvvəlki dövrlərə baxanda istehsalatla əlaqəli hadisələr nəticəsində ölənlərin sayında hansı fərq var? Bu kimi halisələrin sayı ümumən azalmağa doğru gedir, yoxsa artmağa doğru?
Məsələyə münasibət bildirən Əmək Hüquqlarının Müdafiəsi Liqasının rəhbəri Sahib Məmmədovun sözlərinə görə, ümumən götürəndə istehsalat yönümlü qəzalar azalıb: "Ötən il bu sahədə müəyyən qədər ölüm hallarının artması qrup halında baş verən hadisələrlə bağlıdır. Ötən il neft platforması yandı və bir neçə nəfər dünyasın dəyişdi. Həmçinin, platformanın uçması nəticəsində ölənlər oldu. Bu səbəbdən, müəyyən qədər ölənlərin sayı artıb. Ancaq müşahidələr göstərir ki, istehsalat yönümlü qəzalarda ölənlərin sayında azalma tendensiyası var. Bunun da bir neçə səbəbi var. Birincisi, bu istiqamətdə görülən tədbirlər artırılıb. Digər tərəfdən, nəzərə almaq lazımdır ki, tikinti bumu azalıb. Bu kimi qəzalar əsasən tikintidə baş verir. Çünki bu sektorda texniki təhlükəsizlik qaydalarına o qədər də riayət olunmur. Ancaq tikinti bumu aşağı düşdüyünə görə paralel olaraq bu sahədə baş verən qəzaların sayında azalma var. Kollektiv qəzalar səbəbindən ölənlərin sayında artım var. Əvvəlki illərə baxanda belə hadisələrin sayı azalıb".
Vidadi ORDAHALLI
