Məhərrəm Zülfüqarlı: "Bu baxımdan görülən tədbirlər və əldə olunan nəticə müsbət qiymətləndirilməlidir"
1995-1996-cı tədris ilində ümumtəhsil məktəblərini bitirmiş məzunlardan 1301 nəfəri ali təhsil müəssisələrinə qəbul üçün sənəd verib. Onlardan 401 nəfəri müxtəlif ali təhsil ocaqlarına daxil olub, 2015-2016-cı tədris ilində ümumtəhsil məktəblərini bitirmiş məzunlardan isə 2469 nəfəri ali məktəblərə sənəd verib, 1538-i tələbə adını qazanıb.
Bu barədə Naxçıvan Muxtar Respublikası Dövlət Statistika Komitəsinin məlumatında qeyd olunub. Sözügedən məlumatda bildirilib ki, 2015-2016-cı tədris ilində muxtar respublikanın ümumtəhsil məktəbi məzunlarından 500-700 arası bal toplayanların sayı 338 nəfər təşkil edib. Müqayisə üçün qeyd edək ki, 1995-1996-cı tədris ilində 500-700 arası bal toplayanların sayı cəmi 5 nəfər olub.
Bütün bunlar onu göstərir ki, muxtar respublikada təhsil davamlı və müasir tələblər səviyyəsində inkişaf etdirilir. Yeni məktəb binalarının istifadəyə verilməsi, müasir tədris şəraitinin yaradılması tədrisin keyfiyyətini yüksəldib. Naxçıvan Muxtar Respublikası Ali Məclisi sədrinin imzaladığı müvafiq sərəncamlar bu sahənin inkişafında yeni mərhələnin əsasını qoyub.
Sözügedən məsələ ilə bağlı fikirlərini "Bakı-Xəbər"lə bölüşən təhsil eksperti Məhərrəm Zülfüqarlının sözlərinə görə, bu, Naxçıvanda təhsilin yaxşı təşkil olunmasından xəbər verir: "Son illər təhsil sahəsində bir sıra işlər görülüb. Bu sahə ilə bağlı infrastruktur yenidən qurulub. Yeni-yeni məktəblər inşa olunub, digərləri əsaslı şəkildə təmir olunub və s. Ölkə üzrə görülən tədbirlər, təbii ki, Naxçıvan MR-dən də yan keçməyib və orada təhsilin inkişafına müsbət təsir göstərir. Məsələ ondadır ki, ötən illər ərzində orada çoxsaylı məktəb tikilib, məktəblərin maddi-texniki bazası yenidən qurulub. Bütün bunlar düzgün addımdır və hesab edirəm ki, alqışlanmalıdır. Belə müsbət göstəricinin olması həm də o deməkdir ki, Naxçıvanda təhsilin səviyyəsi yüksəkdir. Çünki belə olmasaydı, ali məktəbə qəbul olunanların sayı çox olmazdı. Bu baxımdan görülən tədbirlər və əldə olunan nəticə müsbət qiymətləndirilməlidir. Bu səbəbdən hər il Naxçıvandan ali məktəblərə daxil olan tələbələrin sayı artır".
Vidadi ORDAHALLI
