DİN-in Daxili Qoşunlarında şərəfli döyüş yolu keçərək şəhid olmuş Bəhruz Ağaverdiyevin adını daşıyan Qusar rayonundakı 1 nömrəli tam orta məktəbə texniki səbəblərdən yaranan nasazlıq üzündən bu ilin aprel ayından içməli su verilişi dayandırılmışdı.
Təhsil müəssisəsinin kollektivi və valideyn komitəsinin üzvləri məktəbin içməli su problemini müzakirə edərkən məlum olub ki, yaxınlıqdakı su xətti məktəbin 130 metrliyindən keçir. Bu problemin qısa zamanda həlli və şagirdlərin rahatlığının təmin olunması üçün orta məktəbin kollektivi Qusar RPŞ-nin Şahdağ Polis Bölməsinə müraciət edib. Polis Bölməsinin rəisi, polis mayoru Səbuhi Rüstəmovun məktəb rəhbərliyi ilə görüşəndə problemin aradan qaldırılması, görüləcək işlər müzakirə olunub. Vətəndaş müraciətlərinə həmişə həssaslıqla yanaşan Şahdağ Polis Bölməsinin əməkdaşları bu problemin aradan qaldırılması üçün əllərindən gələni əsirgəməyiblər. Polisin təşkilatçılığı ilə görülən işlər nəticəsində məktəbə içməli su xətti çəkilib və problem artıq aradan qaldırılıb. Həmçinin su xətti çəkilən zaman dağılan asfalt yol da yenidən təmir edilərək istifadəyə verilib.
Məktəb rəhbərliyi, şagird və valideynlər polisin bu xeyirxah təşəbbüsündən və əməlindən məmnun qalıb və bu nəcib addımı yüksək qiymətləndiriblər.
Anar Qafarov, DİN mətbuat xidmətinin əməkdaşı
