DİN Veteranlar Şurasının sədri, istefada olan polis polkovniki Fərhad Süleymanov və bir qrup polis veteranı cəbhəboyu Tərtər, Goranboy, Xocalı rayonlarında səfərdə olub.
Əvvəlcə Tərtər rayon Mədəniyyət Evində Rayon İcra Hakimiyyəti və Polis Şöbəsinin təşkilatçılığı ilə orta məktəblərin pedaqoji kollektivləri, yuxarı sinif şagirdləri, şəhid ailələri ilə "Milli vətənpərvərlik tərbiyəsi" mövzusunda görüş keçirilib.
Tədbirdə çıxış edən RPŞ-nin rəisi, polis polkovniki Rauf Məcidov qeyd edib ki, bu gün ölkəmiz dünya birliyində öz layiqli yerini tutub. Azərbaycanda keçirilən mötəbər tədbirlər ölkəmizdə sabitliyin layiqincə qorunmasının və davamlı inkişafın təmininin əyani təsdiqidir. Azərbaycanın hərbi qüdrətinin durmadan artdığını, dövlət başçısının cəbhə bölgələrinə tez-tez səfərlər etməsinin və hər dəfə hərbçilərlə, rayon ictimaiyyəti ilə keçirdiyi görüşlərin əhalidə ruh yüksəkliyi yaratdığını diqqətə çatdırıb. Polis polkovniki R.Məcidov sabahımızın qurucuları olan gənclərin onlara olan etimadı layiqincə doğrultmaları üçün vətənpərvərlik ruhunda tərbiyə olunmalarının əhəmiyyətindən danışıb.
DİN Veteranlar Şurasının sədri F.Süleymanov çıxışında bildirib ki, bu gün Azərbaycanda həyata keçirilən gənclər siyasətinin, gənclərə göstərilən diqqət və qayğının əsasında ölkəyə layiqli vətəndaş və sağlam nəslin yetişdirilməsi məqsədi dayanır. Müstəqilliyin üçüncü onilliyinə qədəm qoymuş Azərbaycana məhz milli şüura malik, vətənpərvər gənclər lazımdır. Ümummilli liderin əsasını qoyduğu müstəqil Azərbaycanın gənclər siyasəti məhz bu amala xidmət edir. O bildirib ki, vətənpərvərlik hissi tariximizə, doğma torpaqlarımıza bağlılıq və onları düşməndən qorumaqla başlayır. Hər bir ölkənin gələcəyi onun gənclərinin düşüncə tərzindən, intellektual səviyyəsindən asılıdır.
Sonra daha belə bir tədbir Goranboy rayonunda keçirilib. Tədbir iştirakçıları ulu öndərin abidəsini və şəhidlər xiyabanını ziyarət edib, önünə tər çiçəklər düzüblər. İctimaiyyətin nümayəndələri ilə görüşdə çıxış edən istefada olan polis polkovniki F.Süleymanov, Rayon Polis Şöbəsinin təmsilçiləri vətənpərvərlik hissinin böyüməkdə olan nəslə aşılanması, uşaq, yeniyetmə və gənclərin vətənpərvərlik ruhunda tərbiyə olunmasının təlim-tərbiyə işinin ən mühüm istiqamətlərindən, təhsil müəsisələrinin ən vacib vəzifələrindən olduğunu diqqətə çatdırıblar.
Vurğulanıb ki, gənclərlə iş sahəsində görülən tədbirlər Azərbaycan gəncliyinin daha da inkişaf etməsinə təkan verir, onların cəmiyyətdə təsdiq olunmaları üçün şərait yaradır.
Goranboy rayonunun Aşağı Ağcakənd qəsəbəsində polis veteranları və tədbir iştirakçıları əvvəlcə Xocalı soyqırımı qurbanlarının xatirəsinə ucaldılmış abidəni ziyarət edib.
Görüşdə dövlətimizin qüdrətinə, sabahımıza inam ifadə olunub. Çıxış edənlər aprel döyüşləri zamanı bir daha ordumuzun qüdrətinin şahidi olduqlarını deyib, gənclərimizin vətənpərvərlik ruhunu yüksək dəyərləndiriblər. İctimaiyyətin təmsilçiləri tezliklə öz doğma torpaqlarına qayıdacaqlarına əminliklərini bildiriblər.
Bu görüşlərdə DİN-in Şəxsi Heyətlə İş İdarəsinin əməkdaşları - polis polkovnik-leytenantı Elxan Mürsəlov və polis polkovnik-leytenantı Laçın Paşayev də iştirak edib.
Zeyni Hüseynov, DİN mətbuat xidmətinin əməkdaşı
