İyunun 12-də Azərbaycan Milli Elmlər Akademiyasının Biologiya və Tibb Elmləri Bölməsinin Ümumi yığıncağı keçirilib. Yığıncaqda bölmə üzrə AMEA-nın həqiqi və müxbir üzvləri, elmi müəssisələrin direktorları iştirak edib.
Tədbir AMEA Biologiya və Tibb Elmləri Bölməsinin (BTEB) akademik-katibi, akademik Əhliman Əmiraslanovun giriş sözü ilə başlayıb, gündəlikdə olan məsələlər iştirakçıların diqqətinə çatdırılıb. Əvvəlcə akademik Əhliman Əmiraslanov son seçkilərdə BTEB üzrə AMEA-nın yeni seçilmiş həqiqi və müxbir üzvlərini təbrik edib, gül dəstələri təqdim edib. Ümumi yığıncaqda Torpaqşünaslıq və Aqrokimya İnstitutunun Üzvi gübrələr laboratoriyasının müdiri, aqrar elmlər üzrə elmlər doktoru Paşa Zamanov elmə göstərdiyi xidmətlərə görə və 90 illik yubileyi münasibətilə AMEA BTEB-in Fəxri Fərmanı ilə mükafatlandırılıb.
Gündəlikdə olan növbəti məsələ yubileylərin keçirilməsi barədə olub. AMEA-nın müxbir üzvləri İbrahim Əzizov və Əlövsət Quliyevin 70 illiyi, Botanika İnstitutunun elmi işlər üzrə direktor müavini, biologiya üzrə elmlər doktoru Eldar Novruzovun 75 illiyi, Zoologiya İnstitutunun Teriologiya laboratoriyasının müdiri, biologiya üzrə elmlər doktoru Qiyas Quliyevin 70 illiyi və Fiziologiya İnstitutunun Hüceyrənin morfofunksional plastikliyi laboratoriyasının müdiri, biologiya üzrə elmlər doktoru Fəxrəddin Əsgərovun 80 illiyi haqqında institut rəhbərlərinin müraciətləri ətrafında müzakirələr aparılıb.
İclasda bir sıra kadr məsələlərinə baxılıb, eləcə də AMEA Zoologiya İnstitutunda Beynəlxalq əlaqələr şöbəsinin yaradılması ilə bağlı AMEA Rəyasət Heyəti qarşısında vəsatət qaldırılması qərara alınıb. Sonra AMEA Genetik Ehtiyatlar İnstitutunun 3 əməkdaşının Çin və ABŞ-ın tanınmış universitetlərinə ezam olunması ətrafında fikirlər səsləndirilib və müvafiq qərarlar qəbul edilib.
Ümumi yığıncaqda yeni təsis olunmuş "AMEA-nın professoru" elmi adına namizədliyini təqdim etmiş şəxslərin adları diqqətə çatdırılıb. Namizədlərin sənədləri ilə tanışlıqdan sonra elmi və pedaqoji fəaliyyətlərinə dair müzakirələr aparılıb.
Bölmənin akademik-katibi, akademik Əhliman Əmiraslanov "AMEA-nın professoru" elmi adının verilməsi məqsədilə keçirilən seçkidə biologiya və tibb elmləri üzrə 4 namizədin iştirak etdiyini bildirib. Akademik Ə.Əmiraslanov qeyd edib ki, bu ada layiq görüləcək alimlərin Akademiyada baş verən proseslərdə daha yaxından iştirakı təmin ediləcək. Sonra yığıncaq iştirakçıları adları qeyd edilən namizədlər barədə fikirlərini səsləndiriblər.
Sonda gizli səsvermə yolu ilə seçki keçirilib və nəticədə aşağıdakı namizədlərin adları AMEA Rəyasət Heyətinə təqdim ediləcək siyahıya daxil olunub:
Ağayeva Dilzarə Nadir qızı - 1968-ci ildə anadan olub, biologiya üzrə elmlər doktoru, dosent, AMEA-nın Botanika İnstitutunun Mikologiya laboratoriyasının müdiri
Əhmədov Elşad İlyas oğlu - 1969-cu ildə anadan olub, biologiya üzrə elmlər doktoru, dosent, AMEA-nın Zoologiya İnstitutunun elmi işlər üzrə direktor müavini
Qəhrəmanova Fəridə Xosrov qızı - 1972-ci ildə anadan olub, biologiya üzrə elmlər doktoru, professor, AMEA-nın Mikrobiologiya İnstitutunun elmi katibi
Mahalov İslam Şərif oğlu - 1974-cü ildə anadan olub, tibb üzrə elmlər doktoru, Azərbaycan Tibb Universitetinin I Mamalıq-ginekologiya kafedrasının professoru
