Gülnar Eyvazova: "... yalançı turizm şirkətlərinin açılması peşəkar turizm şirkətlərinin imicinə xələl gətirdi"
"Əfsuslar olsun ki, lisenziyaların ləğv olunmasından sonra turizm sənayesində xidmətlərin aşağı səviyyədə göstərilməsi faktları ilə rastlaşdıq". Bunu mədəniyyət və turizm naziri Əbülfəs Qarayev media nümayəndələrinə açıqlamasında deyib.
Nazir qeyd edib ki, turiz fəaliyyəti üçün lisenziyaların ləğv edilməsi biznes mühitinin yaxşılaşmasına doğru atılan bir addımdır. Lakin bundan sui-istifadə edənlər də olur: "Lisenziyaların ləğvi biznesə tam sərbəstlik vermək məqsədi daşıyır. Ona görə də bu çox düzgün addım idi və böyük inkişafa səbəb oldu. Amma, istər-istəməz, vəziyyətdən sui-istifadə edən insanlar da olur".
Ə.Qarayev deyib ki, belə halların qarşısını almaq təkcə dövlətin işi deyil. Turizm şirkətləri də bunun marağında olmalıdır: "Bu gün turizm müəssisələrinin fəaliyyəti üçün lisenziyanın tələb edilməməsinə baxmayaraq, hər bir şirkət öz fəaliyyətini daim təkmilləşdirməlidir: "Belə olmasa, biz dünyada gedən qlobal turizm proseslərinin arxasında qalacağıq. Ona görə də hər turizm şirkəti öz işini təkmilləşdirməyə maraqlı olmalıdır. Mən istəməzdim ki, bələdçi səhv məlumat versin, internetdə yalan məlumat yerləşdirilsin. Çünki dələduzluq faktları bizim ümumi turizm mənzərəmizə kölgə salır".
Bakı Turizm Şirkətinin nümayəndəsi Gülnar Eyvazova "Bakı-Xəbər"ə açıqlamasında lisenziyaların ləğv olunmasının turizm sənayesində xidmətlərin aşağı səviyyədə göstərilməsinə səbəb olduğunu təsdiqlədi. G.Eyvazova təəssüf hissilə bildirdi ki, lisenziya ləğv olunandan sonra turizm şirkətlərinin sayı, demək olar ki, hər gün artır: "Bu sahədən anlayışı olan və olmayan turizm şirkəti açmaq fikrinə düşür. Balaca bir ofis götürüb başlayırlar turlar təşkil etməyə. Onların fəaliyyət göstərməsinə narazılıq etmirik. Sadəcə, onların öz işindən bixəbər olması bizim imicimizə təsir edir. Elə şirkətlər var ki, onlar müştəriyə doğru-düzgün məlumat vermir. Müştərini aldatmaq, pulu alıb yox olmaq kimi faktlar qeydə alınır. Bu kimi hallar bizim kimi turizm şirkətlərinə mənfi təsir göstərir. Bu günlərdə şirkətimizə müraciət edən bir şəxs bizim şirkətə necə etibar olunmasını sual edəndə biz ona lisenziyanın nömrəsini göstərdik. Lakin o şəxs bizə bildirdi ki, artıq lisenziyalar ləğv olunub və mən necə əmin ola bilərəm ki, sizin mənə təklif etdiyiniz turpaket həqiqidir? Təssəvvür edirsiniz bu cür faktlar həqiqi turizm şirkətlərinə necə təsir edir?".
Həmsöhbətimizin sözlərinə görə, lisenziyaların ləğvindən sonra yalançı turizm şirkətlərinin açılması peşəkar turizm şirkətlərinin imicinə xələl gətirdi: "Bu səbəbdən də lisenziyaların bərpa olunmasının tərəfdarıyam. Çünki lisenziyaların xüsusi qaydası var və hər bir şirkət o qaydaya əməl edə bilmir".
Günel CƏLİLOVA
