Məhərrəm Zülfüqarlı: "Özəl ali məktəblərdə təhsil haqqı həddindən artıq yüksəkdir"
Xəbər verildiyi kimi, 2017/2018-ci tədris ili üzrə qeyri-dövlət ali təhsil müəssisələrinə (özəl ali məktəblər) ayrılan plan yerlərinin sayı azaldılıb. Müqayisə üçün qeyd edək ki, 2016/2017-ci tədris ili üzrə özəl ali məktəblərə qəbul planı 7 038 olmuşdusa, növbəti tədris ili üçün bu rəqəm 6195 olacaq.
Ali məktəblər üzrə ən çox plan yeri Azərbaycan Kooperasiya Universitetinə, ən az isə Bakı İslam Universitetinə ayrılıb.
Belə ki, 2016/2017-ci tədris ili üzrə 6 195 qəbul planından 760 yer Xəzər Universiteti, 560 yer Bakı Biznes Universiteti, 480 yer Bakı Avrasiya Universiteti, 390 yer Bakı Qızlar Universiteti, 1115 yer Azərbaycan Kooperasiya Universiteti, 525 yer Azərbaycan Universiteti, 230 yer Azərbaycan Əmək və Sosial Münasibətlər Akademiyası, 345 yer Naxçıvan Universiteti, 780 yer Odlar Yurdu Universiteti, 860 yer Qərb Universiteti, 150 yer isə Bakı İslam Universiteti üçün nəzərdə tutulub.
Növbəti tədris ili üçün qəbul planının azaldılması əsasən 2 özəl ali məktəb - "Təfəkkür" Universiteti və Qafqaz Universiteti ilə bağlı verilən qərarlarla əlaqədardır. Qafqaz Universitetinin təhsil strukturu bütövlükdə Bakı Mühəndislik Universitetinə verilib və bu ali məktəb dövlət statuslu universitet kimi fəaliyyətini davam etdirir. "Təfəkkür" Universiteti isə bu tədris ilindən fəaliyyətini dayandırıb və növbəti il həmin universitetə qəbul aparılmayacaq.
Ümumilikdə, görünən odur ki, son illər özəl universitetlərə maraq azalmaqdadır. Yəni əvvəlki kimi həmin ali məktəblərə axın yoxdur. Bu da, nəticə etibarilə, özəl ali məktəblərin plan yerlərini azaltmağa məcbur edir. Maraqlıdır, bəs ekspertlər yaranan vəziyyəti nə ilə əlaqələndirir?
Məsələyə münasibət bildirən təhsil sahəsi üzrə ekspert Məhərrəm Zülfüqarlı yaranan vəziyyəti bir sıra faktorlarla əlaqələndirir: "Məsələ ondadır ki, Azərbaycandakı özəl ali təhsil sistemi normal inkişaf etmiş ölkələrdən fərqlidir. İnkişaf etmiş ölkələrdə özəllərdə tədrisin səviyyəsi yüksəkdir. Azərbaycanda isə bu belə deyil. Düzdür, ölkədə dövlət universitetləri ilə rəqabətə davamlı özəl ali məktəblər var. Ancaq onların sayı yetərincə deyil. Bütün bunlar, nəticə etibarilə, özəl ali məktəblərə gedənlərin sayının azalmasına öz təsirini göstərir. Ötən il ən az qəbul "Odlar Yurdu" universitetinə olub. Bu ali məktəbə cəmi 61 nəfər qəbul olunub. Bu da həmin universitetin reytinqinin aşağı olmasını göstərir. Bunu "Xəzər" universiteti barədə deyə bilmərik. Dövlət universitetləri arasında da reytinqi aşağı və yuxarı olanlar var. Ümumi baxışda, demək olar ki, Azərbaycanda dövlət universitetlərinə meyl daha çoxdur. Digər tərəfdən, Azərbaycanda Türkiyə ilə müqayisədə təhsil haqqı həddindən artıq yüksəkdir. Bizdə özəl universitetlər bütün xərcləri özləri ödədiyindən, təhsil haqqı yüksəkdir. Qəbul planının azaldılması məhz bu faktorlarla bağlıdır".
Vidadi ORDAHALLI
