Ruslan Quliyev: "Bələdçilik sahəsindən anlayışı olmayan şəxsə sertifikat verilməzsə, otel və ya şirkətlər onları işə götürməz"
Turizm sahəsinin inkişafı istiqamətində ölkədə müəyyən işlər görülür. Müxtəlif sayda, göz oxşayan otellərin sayı günü-gündən artır. Otellərdə çalışan bələdçilərin öz işinin peşəkarı olub-olmaması isə sual doğurur.
Mədəniyyət və turizm naziri bu günlərdə keçirilən konfransda bildirib ki, ölkədə sertifikatsız bələdçi olmamalıdır: "Buna görə də turizm şirkətlərinə tövsiyə edirəm ki, birgə işlədikləri bütün bələdçiləri qeydiyyata alsınlar. O adamlar sertifikatlı olmalıdır".
Qeyd edək ki, bələdçilərin sertifikat məsələsi bir neçə dəfə müzakirə mövzusu olub. Turizm sahəsi üzrə mütəxəssis Ruslan Quliyev "Bakı-Xəbər"ə açıqlamasında qeyd etdi ki, son zamanlar bələdçilərin bir qismi özfəaliyyətlə məşğuldur: "Onların özfəaliyyətlə məşğul olması səbəblərindən biri bu sahədə yaranan boşluqdur. Azərbaycan turizm ictimaiyyəti bu cür fəaliyyətlə məşğul olanları kəskin şəkildə pisləyir. Ümid edirik ki, qısa zaman çərçivəsində Turizm Reyestri yaranandan sonra bu məsələ öz həllini tapacaq. Hər bir bələdçinin sertifikatla təmin olunması vacibdir. Monitorinqlərin həyata keçirilməsi baxımından onlara sertifikat verilməsi lazımdır. Onların öz işini peşəkarcasına icra etməsi həmin sertifikatdan asılıdır. Bələdçilik sahəsindən anlayışı olmayan şəxsə sertifikat verilməzsə, otel və ya şirkətlər onları işə götürməz. Bu səbəbdən də bələdçilərə sertifikat verilməsi mühümdür".
Həmsöhbətimizin sözlərinə görə, bələdçilərin dil bilmə məsələsi hələ də problem olaraq qalır. Çin, yapon, italyan dilini bilən bələdçilərə hələ də ehtiyac var. Bu məsələlər qısa zaman çərçivəsində öz həllini tapmalıdır. Bələdçi-tərcüməçilər üçün tədris proqramı elə hazırlanmalıdır ki, onlar buranı bitirdikdən sonra artıq peşəkar kimi fəaliyyət göstərə bilsin. Burada onlar ingilis və rus dillərini öyrənir, üçüncü dili seçmək isə öz istəkləri ilə bağlıdır. Bu, müxtəlif dil ola bilər. Həmçinin, bələdçi ölkənin ümumi dövlət mənafeyindən çıxış etməlidir və məlumatları turistə bu baxımdan çatdırmalıdır. Ölkənin tarixini, coğrafiyasını, iqtisadiyyatını bilməli, abidələr haqqında mükəmməl məlumata malik olmalıdır. Bu xüsusilə vacibdir. Tarixi abidə haqqında əcnəbiyə hər eşidilən rəvayət danışılmamalıdır. Ümumiyyətlə, belə neqativ hallarla üzləşməmək üçün bələdçilərdə abidələr haqqında rəvayətlərə yox, konkret faktlara əsaslanan məlumatlar olmalıdır".
Günel CƏLİLOVA
