Bahadur Bilalov: "Sahibkarlar həmin fond vasitəsilə güzəştli kredit əldə edib turizm obyektləri aça bilər"
Turizm şirkətlərinə güzəştli kreditlərin verilməsi üzrə fond yaradıla bilər. Bunu gəlmə turizm sahəsində ixtisaslaşmış turoperator və turizm şirkətləri ilə Milli Turizm Bürosunun görüşündə mədəniyyət və turizm naziri Əbülfəs Qarayev deyib. Nazir qeyd edib ki, Mədəniyyət və Turizm Nazirliyinin razılığı olmadan turizm şirkətlərinə güzəştli kreditlər verilmir: "Sahibkarlığa Kömək Milli Fondu kimi, Turizm Fondunun yaradılmasına çalışırıq".
Turizm şirkətlərinə güzəştli kreditlərin verilməsi üçün Turizi Fondunun yaradılmasını ekspertlər də müsbət dəyərləndirir.
Turizm sahəsi üzrə ekspert Bahadur Bilalov bizimlə söhbətində qeyd etdi ki, Turizm Fondunun yaradılması ölkə iqtisadiyyatına müsbət təsir edəcək: "Belə bir fondun yaradılması turizmin ayrı-ayrı sahələrinin inkişafına səbəb ola bilər. Fond olarsa, istirahət üçün Azərbaycana gələnlərin sayı artar. Təbii ki, bununla sahibkarlıq da inkişaf edəcək. Sahibkarlar istirahət məkanlarında turizm obyektləri aça bilər. Sahibkarlar regionlarda müxtəlif formatda turizm obyektləri açmaq imkanı qazanar. Beləliklə, ölkə iqtisadiyyatı daha da inkişaf edər".
Ekspertin fikrincə, Turizm Fondu yaradılarsa, bu, sahibkarlığın inkişafına təkan verər: "Sahibkarlar həmin fond vasitəsilə güzəştli kredit əldə edib turizm obyektləri aça bilər. İstənilən turizm obyektinin xarici gözəlliyi və təqdim olunan xidmətin yüksək səviyyədə olması çoxlu sayda turist deməkdir. İstər yerli, istərsə də xarici turistlər daha çox vizual görkəmə və xidmətə üstünlük verir. Bu keyfiyyətlər olandan sonra turizm sahəsi inkişaf edər".
B.Bilalovun sözlərinə görə, hazırkı şəraitdə turizm sahəsinin inkişafı üçün belə bir fondun yaradılması daha məqsədəuyğundur.
Həmsöhbətimiz onu da əlavə etdi ki, artıq Rusiyada dövlət və böyük turoperatorların iştirakı ilə Turizm Fondu yaradılıb.
Günel CƏLİLOVA
