Müasir klinika və tibb ocaqlarında xəstələrin şəfa tapması üçün hər cür şərait var. Lakin bura müalicə mərkəzi olmaqla yanaşı, həm də müxtəlif xəstələr tərəfindən gətirilən infeksiyalar düşə bilər. Bu baxımdan, xəstəxanaların dezinfeksiyası üçün ciddi və etibarlı metodlardan istifadə olunması böyük önəm daşıyır.
Dünən Azərbaycan Tibb Universitetinin (ATU) Tədris Cərrahiyyə Klinikasında keçirilən seminar məhz bu mövzuya həsr olunub. "ST Company" MMC tərəfindən təşkil olunan tədbirdə klinika işçilərinə xəstəxanadaxili infeksiyalarla mübarizə üsullarından bəhs edilib.
Dezinfeksiya məhsullarının dünya səviyyəsində tanınmış istehsalçı olan Almaniyanın "Dr.Schumacher" GmbH şirkətinin Azərbaycanda rəsmi distribütoru "Tural Medikal" xəstəxanadaxili infeksiyalarla mübarizə tədbirlərinin təkmilləşdirilməsi məqsədilə respublikanın müxtəlif aparıcı xəstəxanalarında bu mövzuda seminarlar təşkil edir.
ATU-nun Tədris Cərrahiyyə Klinikasında da bu qəbildən "Tibb müəssisələrində xəstəxanadaxili infeksiyaların profilaktikası: dezinfeksiya və sterilizasiya" mövzusunda tədbir keçirilib. Tədbirdə tibbi təyinatlı alətlərin, o cümlədən endoskopların istifadədən sonra zərərsizləşdirilməsinin Avropa standartlarına uyğun metodikası, xəstəxanadaxili infeksiyaların profilaktikasında dezinfeksiya və sterilizasiyanın istiqamətləri və rolu, dezinfektant seçim zamanı əsas kriteriyalar, "Dr.Schumacher" GmbH şirkətinin məhsulları timsalında dezinfektantların işçi məhlullarının düzgün hazırlanması və istifadə qaydaları haqqında məlumat verilib.
Seminarda "Dr.Schumacher" GmbH şirkətinin Türkiyə təmsilçisi Aslı Özbiber çıxış edərək, iştirakçıları maraqlandıran sualları cavablandırıb.
Baki-xeber.com
