Məlahət Mürşüdlü: "Məzunlara ali təhsil almaq üçün növbəti şans verilir"
Ali məktəbə qəbul oluna bilməyən gənclər üçün ödənişli hazırlıq qrupları yaradılacaq. Milli Məclisin Elm və təhsil komitəsində "Təhsil haqqında" Qanuna dəyişikliklər edilməsi barədə layihə müzakirəyə çıxarılıb.
Milli Məclisin mətbuat xidmətinin yaydığı məlumata əsasən, Elm və təhsil komitəsinin sədri İsa Həbibbəyli bildirib ki, layihə ölkənin ali təhsil sistemində bakalavriat səviyyəsində birillik ödənişli hazırlıq qruplarının təşkilini nəzərdə tutur. Məqsəd ölkədə ali məktəblərə qəbul oluna bilməyən gənclərin xaricə axınının qarşısını almaq və bilik səviyyəsinin artırılmasına yardım etməkdir.
Layihəyə əsasən hazırlıq qruplarında tədrisin sonunda keçirilən buraxılış imtahanlarında müvəffəqiyyət qazanan abituriyentlər ali təhsil müəssisələrinin birinci kursuna qəbul olunacaq.
Məsələ ilə bağlı fikir bildirən təhsil eksperti Məlahət Mürşüdlü "Bakı-Xəbər"ə açıqlamasında qeyd etdi ki, ali məktəbə qəbul oluna bilməyən abituriyentlər üçün hazırlıq qruplarının yaradılması ilk dəfə olaraq ölkəmizdə tətbiq olunacaq. Məzunlara belə bir şansın verilməsi məqsədəuyğundur: "Abituriyentlər həmin hazırlıq qrupları sayəsində öyrəndikləri bilikləri daha da təkmilləşdirəcək. Məzunlara ali təhsil almaq üçün növbəti şans verilir. Bu imkandan necə bəhrələnəcəyi isə məzunlardan asılıdır. Həmçinin, bunun ödənişli olması abituriyentlərin daha da məsuliyyətli olmasına səbəb olacaq. Çünki onların valideynlərinin hazırlıq üçün müəyyən məbləğdə ödəniş etdiyini nəzərə alsaq, bu işdə yüksək nəticə əldə olunar".
Həmsöhbətimiz onu da əlavə etdi ki, ali məktəbə qəbul oluna bilməyən abituriyentlərin bir qismi xaricdə təhsilə üstünlük verir: "Heç bir imtahan keçirilmədən xaricdə universitetə qəbul həyata keçirilir. Həmin tədris ocaqlarında təhsil alıb qayıdanların sonrakı taleyi bəllidir. Bu səbəbdən də gənclərimizin sağlam təhsil alması məqsədilə onlar üçün hazırlıq qrupları yaradılıb. Bu qruplar sayəsində tələbə adını qazanan gənclərin sayı daha da artacaq".
Günel CƏLİLOVA
