Azərbaycana bu il ərzində gələn turistlərin sayı açıqlanıb. Trend-in məlumatına görə, Milli Turizm Təbliğat Bürosunun getmə turizm sahəsində ixtisaslaşmış tur operator və turizm şirkətləri ilə görüşdə çıxış edən mədəniyyət və turizm naziri Əbülfəs Qarayev deyib ki, keçən ilin may ayında Azərbaycana 174 min nəfər, bu ilin mayında isə 211 min turist səfər edib: "Bu, kifayət qədər böyük rəqəmdir və artım böyükdür. Təxminən 30 faiz artım müşahidə edilib".
Nazir deyib ki, ümumilikfə ötən ilin beş ayında ölkəyə 768 min turist gəlmişdisə, bu il onların sayı 956 minə çatıb: "Bu, 200 mindən artıq turist artımı deməkdir. Bu, artımlar viza rejiminin sadələşdirilməsi ilə birbaşa bağlıdır. Bu gün biz 90-a qədər ölkəyə qapımızı açmışıq".
Əbülfəs Qarayev deyib ki, Azərbaycanda turizm sənayesi mövsüm açılışına hazırdır. Ölkədə iyunun 15-dən sentyabrın 15-ə kimi yay mövsümunün olması nəzərdə tutulub.
Nazir deyib ki, Azərbaycanda istirahət edən insanların sayı artıb. Bu il ötən ilə nisbətən Azərbaycana xaricdən gələn qonaqların sayı daha da çox olacaq.
Ə.Qarayev qeyd edib ki, bu yay da Azərbaycana ərəb ölkələrindən, Rusiyadan, İrandan gələcək turistlərin sayının çoxalağı gözlənilir.
Ə.Qarayev onu da əlavə edib ki, "Formula 1" yarışlarının keçiriləcəyi müddət üçün ölkəmizdəki böyük mehmanxana şəbəkələrinin yerlərinin 95 faizi dola bilər. Nazir artıq həmin müddət üçün sifarişlərin verildiyini də söyləyib.
Ə.Qarayev deyib ki, Azərbaycanda hostellərin fəaliyyəti ilə bağlı qanunvericiliyə dəyişiklik ediləcək. Nazir deyib ki, bu yaxınlarda Prezident İlham Əliyev bununla bağlı müvafiq tapşırıq və sərəncam verib: "Qanunvericlik çərçivəsində özəl evlərdə və yaşayış binalarında mehmanxana fəaliyyəti ilə məşğul olan zaman müvafiq şərtlərə əməl olunmalıdır. Bunun üçün şərtlərin işlənərək hazırlanması ilə bağlı tapşırıqlar verilib. Biz hazırda onun üzərində işləyirik. Düşünürəm ki, təxminən 2 ay müddətində bu şərtlər təsdiq olunacaq. Bundan sonra artıq insanlar hostellərin nə olduğunu kifayət qədər aydın təsəvvür edə biləcəklər".
Nazir qeyd edib ki, bu gün hostellərin fəaliyyəti pərakəndə şəkildə təşkil edilir: "Tendensiya göstərir ki, hostellərə insanlar, xüsusilə gənclər tərəfindən maraq var. İnsanlar kifayət qədər normal şəraiti olan, şəhərin mərkəzində yerləşən məkanlarda məskunlaşmaq istəyirlər".
