Ölkəmizdə sabitliyin qorunmasında, əminamanlığın bərqərar olmasında, digər hüquq-mühafizə orqanları ilə yanaşı, daxili işlər orqanları əməkdaşlarının da rolu danılmazdır. İnamla deyə bilərik ki, düz 24 il bundan öncə yenidən qazandığımız müstəqilliyimizi qorumaq naminə üzərinə düşən vəzifələri vicdanla və şərəflə yerinə yetirənlərin, dövlətini və xalqını sevənlərin cərgəsində həmkarlarımız ön sıralardadır.
Bu gün Azərbaycan böyük dövlətlərin tərəfdaşı kimi tanınır və əldə etdiyimiz uğurların sayı ildən-ilə artır. Beynəlxalq idman yarışlarının, mötəbər tədbirlərin keçirilməsi isə davamlı inkişafın və tərəqqinin göstəricisidir. Bizi söz sahibi edən naliyyətlərin fövqündə həm də sağlamlıq dayanır desək, yanılmarıq. Xalqımızın sağlamlığı, bu istiqamətdə maarifləndirmə işlərinin davamlı aparılması dövlət siyasətinin əsas prioritetlərindəndir.
DİO əməkdaşlarının sağlamlığı üçün yaradılan şərait də bu sahəyə ölkə və DİN rəhbərliyinin ali diqqətinin nəticəsidir. Sağlamlıq xidmətin təşkilində və qarşıya qoyulan hədəflərə çatmaq üçün əsas şərtlərdəndir. DİN Tibb İdarəsinin general-leytenant Arif Heydərov adına Respublika Hospitalında, 1 nömrəli və 2 nömrəli poliklinikalarda şəxsi heyətin sağlamlığına rəhbərliyin müntəzəm nəzarəti həmkarlarımızın işində, xidmətində əsaslı dönüş yaradıb, bu da cinayətkarlıqla mübarizənin səmərəsini artırıb. Sağlam canla və sağlam ruhla əldə edilən hər bir uğur isə, əlbəttə ki, vətəndaş məmnunluğuna xidmət edir.
Tibb xidməti üçün yeni müasir və yüksək standartlara cavab verən obyektlərin tikilib istismara verilməsi, zəruri müasir texniki vasitə və avadanlıqlarla təminat ölkəmizdə səhiyyənin inkişafına verilən töhfə kimi dəyərləndirilməlidir. Bütün bunlarla yanaşı, əmək qabiliyyətinin yüksək səviyyədə saxlanması, sağlamlığın qorunması məqsədilə hər il mütəşəkkil qaydada keçirilən profilaktik tibbi müayinələrin təşkili həm də DİO əməkdaşlarının məsuliyyət hissini artırır.
Bu məqsədlə ölkə Prezidentinin müvafiq fərmanı ilə təsdiq edilmiş "Azərbaycan Respublikasının Daxili İşlər Nazirliyi Haqqında" Əsasnamənin tələblərinə uyğun olaraq, Azərbaycan Respublikası Daxili İşlər Nazirliyinin rəhbərliyi tərəfindən daxili işlər orqanlarının əməkdaşları, onların ailə üzvləri, təqaüdçülərlə yanaşı, müraciət edən vətəndaşlara da yüksək tibbi yardım göstərilir, müayinə və müalicə işləri aparılır. Elə DİN-in Tibb İdarəsinin struktur qurumu olan 1 saylı poliklinikada öz xidməti vəzifələrini yüksək səviyyədə yerinə yetirən peşəkar həkim heyətinin bu il dispanserizasiyadan keçən əməkdaşlarımıza göstərdikləri diqqətin şahidi kimi deyə bilərəm ki, sağlamlığımız etibarlı əllərdədir.
Bəlkə oxucular üçün də maraqlı müqayisə olar. Mən əvvəllər Ukraynada xidmət etmişəm və 1996-cı ildən Azərbaycanda daxili işlər orqanlarında xidmətdəyəm. Apardığım təhlillər və müşahidələrim onu deməyə əsas verir ki, ordakı tibbi xidmət və DİO əməkdaşları üçün yaradılan tibbi şərait ölkəmizlə müqayisədə çox geri qalıb.
Günü-gündən yüksələn xətlə inkişaf edən ölkəmizin uğurlarının üfüqləri daha da genişlənməkdədir. Əsrimizlə ayaqlaşmaq istəyimizin və yeni-yeni nailiyyətlər əldə etmək üçün göstərdiyimiz çabaların nüvəsində isə qədrini bildiyimiz (həm də bilmədiyimiz) sağlamlığımız dayanır.
Sabit Əliyev, Xəzər Rayon Mühafizə İdarəsinin rəisi, polis polkovniki
