İldırım Musayev: "Çadır turizmi üçün əsas məqam təhlükəsizliyin təmin olunmasıdır"
Artıq turizm sezonuna start verilib. Şəhərin səs-küyündən uzaqlaşıb kəndə üz tutanlar az deyil. Bir çoxu kənd həyatının gözəlliklərindən, təbiətdən zövq alaraq stress atır. Digərləri xarici ölkələrə üz tutub həmin ölkələrin tarixi yerlərini gəzərək dincəlir. Bir qisim insan da dəniz kənarında günəş vannası qəbul etməyə üstünlük verir. Bir sözlə, insanlar stressli şəhər həyatından uzaqlaşıb təbiət qoynunda istirahət etməyə daha çox üstünük verir.
Təbiət qoynunda istirahət etmək istəyənlər üçün bir neçə seçim var. Kimisi kənd evlərini icarəyə götürüb bir neçə günlük istirahət edir. Kimisi də rayonlarda olan otellərdə qalmağa maraqlıdır. Ancaq bir qisim insan da var ki, onlar adrenalini sevir. Sırf təbiət qoynunda, rahat yataq deyil, çadırda yaşamağa üstünlük verənlər az deyil. Turizmin bu növünü sevənlər təbiətin ağuşuna çəkilib bir müddət bu gözəllikdən zövq alır, dağların ətəyində, meşələrin dərinliklərində kamplar (düşərgə) quraraq yaşayırlar. Bu istirahət növü xarici ölkələrdə geniş yayılsa da, Azərbaycanda turizmin bu növünə maraq azdır.
Çadır turizminə marağın artması üçün ekspertlər müxtəlif təkliflər irəli sürür.
Turizm sahəsi üzrə ekspert İldırım Musayevin sözlərinə görə, ölkəmiz üçün bu turizmdən danışmaq hələ tezdir: "Bu barədə insanların çoxu məlumatlı deyil. Daha çox təbiət qoynunda əylənərək istirahət etmək istəyənlər üçün çadır turizmi maraqlıdır. Bu, komforta çox da önəm verməyən insanların seçimi ola bilər. Lakin çadırların yerini yerli idarəetmə orqanları, bələdiyyələrlə razılaşdırmaq, qida təminatı, ekoloji normaların pozulmaması, sanitar-gigiyenik problemlərin həlli, yanğın və digər fövqəladə vəziyyətlərdə davranış qaydalarını bilmək tələb olunur. Ölkəmizdə bu sahədə ixtisaslaşmış turizm şirkətləri, mütəxəssislər yoxdur. Bu sahənin inkişafı üçün dəstəyə ehtiyac var. Turistin müraciət edəcəyi şirkətin, sadəcə, çadır təşkil etməsi yetərli deyil. Onu da deyim ki, hazırda ölkəmizdə bu sahənin inkişafına heç kim mane olmur. Lakin bunun üçün ixtisaslaşmış mütəxəssislər lazımdır. Sadəcə, çadır quraşdırmaqla turizm olmaz. Ayrı-ayrı fərdlərin çadırlarını istədikləri yerdə qurub gecələməsi isə çadır turizmi hesab edilə bilməz. İstirahət etmək istəyən adam dediyimiz bu əlavə imkanları tələb etməlidir. Çünki, ən azı, təhlükəsizlik məsələsi hər kəsin narahat olduğu məqamdır. Gecə bir yanğın baş versə, turistin təhlükəsizliyini kim təmin edəcək? Lakin bu gün turizm şirkətlərinə müraciət olduğu halda, onların təşkil etmək imkanı barədə dəqiq söz deyə bilmərəm. Ancaq bizim şirkətlərin daha çox pul qazanmaq istəyini nəzərə alsaq, yəqin ki, təşkil etməyə çalışarlar. Əsas məsələ, sadəcə, çadır qurmaq deyil. Lazımi məlumatların olması mütləqdir. Bunu isə ancaq professional turizm şirkətləri etməlidir. Bu, adi bir kənd sakininin quracağı məsələ deyil".
Günel CƏLİLOVA
