Seyid Camal Əzimbəyli: "Çünki bəzən dini icmalar ideoloji baxımdan yad təsirlərin dairəsinə düşür"
Azərbaycan Dini Qurumlarla İş üzrə Dövlət Komitəsində (DQİDK) layihələri maliyyələşdirilmiş dini icma sədrlərinin iştirakı ilə tədbir keçirilib. Komitədən verilən məlumata görə, tədbirdə Dövlət Komitəsi sədrinin birinci müavini Səyyad Salahlı, Aparat rəhbəri, şöbə müdirləri və dini icmaların rəhbərləri iştirak edib.
Dini icma sədrləri çıxış edərək dini sahəyə göstərdiyi diqqət və qayğıya görə Prezident İlham Əliyevə təşəkkürlərini bildirib.
Tədbirdə qeyd olunub ki, Prezident İlham Əliyevin 27 noyabr 2014-cü ildə imzaladığı Sərəncama uyğun olaraq, Dini Qurumlarla İş üzrə Dövlət Komitəsi tərəfindən 216 dini icmanın layihələri maliyyələşdirilib. Belə ki, bunlardan 19-u qeyri-islam, 197-si isə islam dini icmasıdır. DQİDK-ya təqdim etdikləri layihələri maliyyələşdirilmiş icmalar tərəfindən vəsait hesabına dini maarifləndirmə və milli-mənəvi dəyərlərimizin təbliği, gənclərin dini radikal təsirlərdən qorunması istiqamətində Bakı şəhərində və respublikanın regionlarında müxtəlif tədbirlər həyata keçirilir, kitablar çap edilir.
Ümumilikdə, DQİDK tərəfindən 216 dini icmanın layihələrinin maliyyələşdirilməsinə münasibət necədir? Bunun nə kimi əhəmiyyəti var?
Məsələyə münasibət bildirən şərqşünas Seyid Camal Əzimbəylinin sözlərinə görə, belə layihələrin həyata keçirilməsi ölkədə din-dövlət münasibətlərinin möhkəmlənməsinə və Azərbaycanda dini inancın yad təsirlərdən qorunmasına xidmət edir: "Fikrimcə, bu, ideoloji baxımdan ən gözəl üsuldur. Düşünürəm ki, bu, milli və dini kimliyin mühafizə olunması, qorunması yolunda çox uğurlu bir sistemdir. Niyə? Çünki bəzən dini icmalar ideoloji baxımdan yad təsirlərin dairəsinə düşür. Belə hallar zaman-zaman Azərbaycan dövlətçiliyi üçün zərərli nələrəsə gətirib çıxarırdı. Ancaq neçə illərdir bu layihələrin həyata keçirilməsi nəticəsində yerlərdə proqramlı şəkildə maarifləndirmə işlərinin qurulması öz effektini verir. Bu işlərdə peşəkar mənəviyyat adamlarının, dövlətçiliyə, milli şüura malik insanların da iştirakı, demək olar, əlavə stimul yaradır. Ona görə də mən bunu çox uğurlu layihə kimi qəbul edirəm. İnanıram ki, bunların davamlı olması gələcəkdə bütünlüklə Azərbaycandakı inanclı insanların yad təsirlərdən mühafizəsi üçün çox böyük əhəmiyyət kəsb edəcək". Vidadi ORDAHALLI
