Rasim Mədəd: "Elə etmək lazımdır ki, uşaq siqaret çəkməyə, bu haqda düşünməyə vaxt tapmasın"
Azərbaycanda yetkinlik yaşına çatmayanların tütündən (siqaretdən) istifadə etməsinə görə valideynlər və yaxud qəyyumluq edən şəxslərlə bağlı ayrıca cəzalar müəyyənləşdirilir. Bununla bağlı İnzibati Xətalar Məcəlləsinin 189-cu (Uşaqların təlim-tərbiyəsi vəzifələrinin valideynlər və ya onları əvəz edən şəxslər tərəfindən yerinə yetirilməməsi) maddəsinə əlavələr təklif edilir.
Layihəyə görə, yetkinlik yaşına çatmayanların tərbiyə və təlimi vəzifələrinin valideynlər və ya onları əvəz edən şəxslər tərəfindən həyata keçirilməməsi tütündən istifadəsinə səbəb olduqda, 100 manatdan 250 manata qədər cərimə tətbiq olunacaq.
Məlumat üçün bildirək ki, layihə Milli Məclisin plenar iclasına tövsiyə olunub.
Siqaret çəkən uşaqların valideynlərinin 250 manat dəyərində cərimələnməsinə fikir bildirən "Siqaretsiz Həyat" İctimai Birliyinin sədri Rasim Mədəd qeyd etdi ki, siqaretlə bağlı bir sıra qanunlar qəbul edilib: "Lakin bu qanunları qəbul etməklə yanaşı, onların icrasını da təmin etmək lazımdır. Baxın, azyaşlılara siqaretin satılmasını yasaqlayan qanun layihəsi qəbul edildi. Gəlin görək bu qanun icra olundumu? Əksər mağazalarda azyaşlılara siqaret bu gün də satılır. Belə olan halda, valideynlərin cərimə edilməsi nə verəcək?
Öncə uşaqları siqaretdən uzaq tutmaq lazımdır. Valideyn uşağı düzgün tərbiyə etməlidir. Lakin tərbiyə yalnız siqaretlə məhdudlaşmır. Siqaret çəkməyə görə valideyn cərimələnirsə, o zaman gərək digər məsələləri də qaldıraq. Spirtli içki, narkomaniya və s. kimi məsələlər mövcuddur.
Cərimə valideyn üçün sırf maddi ziyandır. Uşaq bu cərimədən nəticə çıxarmayacaq. Uşaq həm evdə, həm məktəbdə, həm də cəmiyyətdə tərbiyə alır. Uşaq kənara çıxıb ictimai tərbiyəni görmürsə, o zaman çox ciddi problemlər meydana çıxacaq. Yeniyetmələrin asudə vaxtının səmərəli şəkildə keçirilməsini təşkil etmək lazımdır. Elə etmək lazımdır ki, uşaq siqaret çəkməyə, bu haqda düşünməyə vaxt tapmasın.
Hesab edirəm ki, bu problemin qarşısını almaq üçün ciddi maarifləndirmə işləri aparılmalı, həmçinin, qəbul edilən qanunların icrasına nəzarət artırılmalıdır. Çünki bu problemin başlıca həlli maarifləndirmədən keçir".
Günel CƏLİLOVA
