Bahadur Bilalov: "Məşhur yarışların və ya şouların Bakıda keçirilməsi turistlərin paytaxtımıza gəlməsinə səbəb olur"
Bakı rusiyalı turistlər arasında yay aylarında həftəsonu üçün populyar şəhərlər arasında ilk beşlikdə yer alıb. Bu, "TurStat" analitik agentliyinin yeni hesabatından məlum olub. İlk beşliyə Minsk, Praqa, Tiflis və Tallin daxil olub.
Məlumata görə, rusiyalı turistlər Bakıya orta hesabla 2,5 gün müddətinə gəlir və gün ərzində 85 dollar xərcləyir.
Rusiyalı turistləri Azərbaycan paytaxtına əsasən 23-25 iyun tarixlərində keçiriləcək "Formula 1" yarışı və 27-30 iyul tarixlərində baş tutacaq "Jara" musiqi festivalı cəlb edir.
Bakının rusiyalı turistlər üçün cəlbedici şəhər olması dəfələrlə müxtəlif ölkələrin reytinq hesabatlarında öz əksini tapıb.
Turizm sahəsi üzrə ekspert Bahadur Bilalov hesab edir ki, Bakı hər zaman rus turistlərinin diqqət mərkəzində olub: "Turistlər bəzən Bakını Dubayla müqayisə edir. İki şəhər arasında müəyyən bənzərliklər rus turistlərini cəlb edir. Eyni zamanda, Bakı sakinlərinin qonaqpərvər olması turistlərin diqqətindən yayınmır. Başqa bir tərəfdən, nəzərə almaq lazımdır ki, Sovet İttifaqının dağılmasından uzun illər ötsə də, Azərbaycan rusiyalıların arzu edilən qonaq olduğu azsaylı qonşu ölkələrdən biridir. Hesab edirəm ki, bu amilin də Rusiya turistlərinin cəlb olunmasında xüsusi rolu var".
Həmsöhbətimiz onu da vurğuladı ki, paytaxt ərazisində keçirilən beynəlxalq əhəmiyyətli tədbirlər turistlərin diqqətini cəlb edir: "Bu yaxınlarda keçiriləcək "Formula 1" yarışını izləmək üçün tək Rusiyadan deyil, eyni zamanda, digər ölkələrdən də gələnlərin sayı az olmayacaq. Məşhur yarışların və ya şouların Bakıda keçirilməsi turistlərin paytaxtımıza gəlməsinə səbəb olur. Həmçinin, "Jara" musiqi festivalı da rus turistlərinin Bakıya marağını daha da artırır".
Ekspertin sözlərinə görə, qarşıdakı aylarda ölkəmizə gələcək rusiyalı turistlərin sayı daha da artacaq. Günel CƏLİLOVA
