Şəmsəddin Əliyev: "Nəzərə almaq lazımdır ki, DİN-in bu istiqamətdə kifayət qədər səriştəsi və peşəkarlığı var"
Məlum olduğu kimi, son dövrlər Daxili İşlər Nazirliyi (DİN) tərəfindən insan və vətəndaş hüquq və azadlıqlarının təmini sahəsində tabelikdəki orqan və hissələrin fəaliyyətinin daha da təkmilləşdirilməsi, müasir tələblərə uyğunlaşdırılması, habelə vətəndaş məmnunluğunu təmin etmək məqsədilə lazımi tədbirlər həyata keçirilir. Belə ki, mülki-hüquqi öhdəliklərin icrasından yayınan borclu şəxslərin axtarışının mərkəzləşdirilmiş uçotları ilə bağlı fəaliyyətin yaxşılaşdırılması məqsədilə DİN-in rəsmi veb saytında (www.mia.gov.az) yeni informasiya resursu yaradılıb.
Bu ilin iyun ayından etibarən istifadəyə verilmiş interaktiv pəncərə vasitəsilə vətəndaşlar mülki-hüquqi öhdəliklərin icrasından yayınan borclu şəxs kimi axtarışda, habelə sərhədkeçməyə məhdudiyyət siyahılarında adlarının olub-olmaması barədə məlumatları əldə edə bilər.
Bunun üçün DİN-in mia.gov.az (http://mia.gov.az/?//content/liability) saytına daxil olmaqla, qeyd edilən elektron xidməti (Ölkədən getmək hüququ müvəqqəti məhdudlaşdırılmış borclular barədə məlumatlar) seçərək, pəncərələrdəki müvafiq şəxsi məlumatları doldurub təsdiq etməklə lazımi informasiyanı ala bilərsiniz.
Şübhəsiz, belə bir informasiya resursunun olması imkan verəcək ki, borcdan yayınanlar azalsın. Bu həm də digər vətəndaşların müfəssəl informasiya əldə etməsinə yardımçı olacaq. Eyni zamanda, əvvəlcədən işin daha düzgün təşkil olunmasına və digər məsələlərə müsbət təsir göstərəcək. Maraqlıdır, bəs ekspertlər belə bir informasiya resursunun yaradılmasının əhəmiyyətini necə dəyərləndirir?
Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, belə bir informasiya sisteminin yaradılmasının əhəmiyyəti böyükdür: "Bu, müasir dövrün tələbindən irəli gələn məsələdir. Bir sıra Avropa ölkələrində olduğu kimi, Azərbaycanda da elektron hökumət, məhkəmə prosedurlarının həyata keçirilməsinə başlanıb. DİN-in veb saytında belə bir onlayn informasiya sisteminin olması bu istiqamətdə görülən işlərə öz töhfəsini verəcək. Həm çevik reaksiya, həm də məlumatın ora tez daxil olması və tez reaksiya verilməsi baxımından DİN-in fəaliyyət istiqamətinə uyğun olan bir haldır. Bu da borc öhdəliyi olanların tez və operativ müəyyən olunmasına öz müsbət təsirini göstərəcək. Onların yerinin müəyyən edilib aşkar olunması baxımından bunun müsbət əhəmiyyəti var. Nəzərə almaq lazımdır ki, DİN-in bu istiqamətdə kifayət qədər səriştəsi və peşəkarlığı var. İlk dövrlərdə ola bilsin ki, vətəndaşlar bu informasiya resursundan az istifadə etsin. Ancaq müəyyən müddətdən sonra bundan istifadə edənlərin sayı artacaq. Yəni bunun səmərəsi daha çox olacaq".
Vidadi ORDAHALLI
