İsmayıllı RPŞ-də "Təmiz Dünya" Qadınlara Yardım İctimai Birliyinin sədri Mehriban Zeynalovanın iştirakı ilə "İnsan alveri ilə mübarizədə yeni standartların tətbiqi" layihəsi çərçivəsində "Gender əsaslı zorakılıq - insan alveri və məişət zorakılığı qurbanları ilə davranış modeli" adlı təlim keçirilib.
Tədbiri giriş sözü ilə açan rəis, polis polkovniki Telman Ağasiyev keçirilən təlimlərin mahiyyəti, insan alverinə qarşı mübarizə, ailə və məişət zorakılığı haqqında məlumat verib.
Öz çıxışında Mehriban Zeynalova bu vacib məsələ ilə bağlı məlumat verərək bildirib ki, Daxili İşlər Nazirliyi insan alverinə qarşı mübarizədə çox fəal mövqedədir. Amma bu tədbirlərdə aidiyyəti dövlət qurumları ilə yanaşı, qeyri-hökumət təşkilatları və könüllülər də fəallıq göstərməlidir. Onun sözlərinə görə, belə tədbirlərin məqsədi insan alverinə qarşı mübarizənin səmərəliliyini artırmaq, əhalinin bu problemlə bağlı maarifləndirilməsi işlərini və ictimai səyləri yüksəltmək, insan alverinin qarşısını almağa nail olmaqdır.
Tədbirin sonunda əməkdaşlara bukletlər paylanıb, onları maraqlandıran suallar cavablandırılıb.
Zeyni Hüseynov, DİN Mətbuat Xidmətinin əməkdaşı
