Nahid Bağırov: "Dövlət tərəfindən turizm müəssisələrinə nəzarət mexanizmi yaradılmalıdır"
"Azərbaycanda turizm müəssisələrinə, o cümlədən hostellərə nəzarət üçün mütləq mexanizm yaradılmalıdır". Bunu media nümayəndələrinə açıqlamasında Azərbaycan Turizm Assosiasiyası (AzTA) sədrinin müşaviri Müzəffər Ağakərimov bildirib.
O qeyd edib ki, Mədəniyyət və Turizm Nazirliyi hostellərin qeydiyyatını aparmadığından, onların sayını müəyyənləşdirə bilmir. Ona görə də mütləq reyestr hazırlanmalı və hostellərin adları oraya daxil edilməlidir: "Hostellərin sayı yalnız vergilər orqanlarında olur. Bu düzgün deyil. Necə ola bilər ki, neçə hostelin açılmasından Mədəniyyət və Turizm Nazirliyinin məlumatı olmur? Məlumat olmadıqda işi təşkil etmək çox çətindir. Çünki informasiya olmadıqda ölkədə nə qədər hotelə, hostelə ehtiyacın olduğunu müəyyənləşdirmək mümkün deyil. Buna görə də yeni açılan turizm müəssisələrinin hamısı nəzarət mexanizmindən keçməlidir".
Qeyd edək ki, xarici ölkələrdə turizm müəssisələrinə nəzarət etmək üçün Dövlət Turizm Reyestri yaradılır. Həmin ölkələrdə fəaliyyət göstərən turizm şirkətləri, hotellər, bələdçilər bu reyestrə mütləq şəkildə daxil olmalıdır.
Azərbaycanda da belə bir təcrübəni tətbiq etmək olar.
Azərbaycan Turizm Assosiasiyasının sədri Nahid Bağırovun sözlərinə görə, lisenziyanın ləğvi gözəl addım idi, müsbət tərəfləri də oldu: "Hazırda 400 yox, 700-dən yuxarı turizm şirkəti kimi fəaliyyət göstərən qurum yaranıb. Amma bu dəyişiklikdən sui-istifadə edənlər də az deyil. Bəzi turizm şirkətlərinin dələduzluqla məşğul olması faktı da aşkarlanıb. Yerli turistlər səyahət putyovkası alıb hansısa ölkəyə getmək istəyir. Bəzən, ən yaxşı halda, hava limanında məlum olur ki, əllərində olan sənədlər, bilet bronları saxtadır. Bəzən gedirlər başqa ölkəyə, orada bilinir ki, onların otellərinin pulu ödənilməyib. Əldə olan çeklər isə adi kağız qədər hüquqi əhəmiyyətsizdir. Lisenziya ləğv olunandan sonra yüzlərlə belə şikayət olur. Ölkəyə gələn turistlərin də aldadılması halı olur. Burada olan, adını turizm şirkəti qoyan dələduzlar onların pulunu alır, amma söz verdikləri xidməti təqdim etmirlər. Bunlara yol vermək olmaz".
Həmsöhbətimiz bildirdi ki, əslində, lisenziyasız fəaliyyətin tərəfdarı olsaq da, proseslər müəyyən nəzarət olmasını tələb edir: "Dövlət Turizm Reyestrinin olması alqışlanmalıdır. Əslində, biz deməliyik ki, lisenziyanın ləğv olunması gözəldir, reyestri istəmirik. Amma bu gün elə hala gəlib çıxmışıq ki, öz tərəfimizdən nazirə müraciət edib lisenziya olmasa da, turizm reyestrinin tətbiq edilməsini xahiş edirik. Dövlət tərəfindən bu mexanizm yaradılmalıdır. Yay mövsümü artıq başlayır. Dünyanın hər yerində belə bir praktika var".
Günel CƏLİLOVA
