Rasif Bağırov: "Xaricdən dəvət edilən həkimlər müalicə etdikləri xəstələrin sonrakı sağlamlığına cavabdehlik daşımır"
Özəl klinikalar xaricdən tez-tez həkimlər dəvət edir. Vətəndaşlar isə həmin həkimlərin qəbuluna düşmək üçün bir neçə gün öncədən növbəyə yazılır. Həmin həkimlərin müalicəsini götürən xəstə müalicə bitəndən sonra onları tapa bilmir. Səbəb isə xarici həkimlərin özəl xəstəxanalarda müəyyən müddət üçün gəlib işləməsi olur. Belə olan halda, olan yenə də bizim vətəndaşlara olur. Onların həmin həkimlərin tətbiq etdiyi müalicəni edir və sonra bunun nəticəsi ilə bağlı onları tapa bilmir. Bununla da əcnəbi həkimlərə inam azalır.
Milli Məclisin Səhiyyə komitəsinin bu günlərdə keçirilən iclasında deputatlar Azərbaycana xaricdən gələn həkimlərlə bağlı araşdırma aparılması məsələsini qaldırıb.
Millət vəkilləri Qənirə Paşayeva və Rafiq Məmmədhəsənov xaricdən gələn və hər gün KİV-də reklam olunan həkimlərlə bağlı məsələnin araşdırılmasının vacib olduğunu bildiriblər.
R.Məmmədhəsənov deyib ki, xaricdən gələn həkimləri heç öz ölkəsində tanıyan yoxdur: "Onlar yaxşı həkim olsa, ölkələrində qalıb işləyər. Onlar bizim ölkəmizdə özlərini reklam edir. Xəstələr də bu reklamı görüb yanlarına gedir. Sonradan isə səhhətlərində ciddi fəsadlar ortaya çıxır və bizim həkimlər onları müalicə etməli olur".
Xaricdən gətirilən həkimlərin, əslində, öz ölkələrində tanınmadığı və onlara tibb işçisi kimi etibar olunmadığı tibb ekspertləri tərəfindən də iddia olunur.
Tibb sahəsi üzrə ekspert Rasif Bağırov bizimlə söhbətində qeyd etdi ki, Azərbaycanda müalicə aparan xarici həkimə qarşı hansısa bir iddia qaldırmaq mümkünsüzdür: "Xaricdən dəvət edilən həkimlər müalicə etdikləri xəstələrin sonrakı sağlamlığına cavabdehlik daşımır. Başqa sözlə, bir-iki günlük səfərləri ilə müalicə etdikləri xəstələrin sonrakı taleyi bu həkimlər üçün önəm daşımır. Azərbaycana dəvət edilən əcnəbi həkimlərin hansı dərəcədə mütəxəssis olması, hansı dərəcədə tibbi savada malik olması cəmiyyət üçün qaranlıq qalır. Çünki belə "mütəxəssislər" ya internet vasitəsilə, ya da təsadüfi tanışlıqla dəvət edilir. Onların tibb sahəsində hansı nailiyyətlər əldə etməsi isə nəinki sadə vətəndaşlara, heç özəl klinikaların özünə də bəlli olmur. Bu səbəbdən xaricdən dəvət olunan hər hansı bir həkimin peşəkar olub-olmaması araşdırılmalıdır. Bu işə nəzarət aidiyyəti qurumlar tərəfindən həyata keçirilməlidir".
Günel CƏLİLOVA
