Aynur Əliyeva: "El arasında "sudoroqa" kimi tanınan xəstəlik ən təhlükəli nevroloji xəstəliklərdən biridir"
Uşaqlar arasında nevroloji xəstəliklərin sayı artıb. Səhiyyə Nazirliyinin Uşaq Bərpa Müalicə Mərkəzinin baş həkimi Cəmilə Talıbova media nümayəndələrinə açıqlamasında qeyd edib ki, mərkəzə müraciət edən uşaqların 40 faizdən çoxunun nevroloji problemi var:
"Mərkəzə müraciət edən uşaqlar il ərzində 3-5 dəfə müalicə-bərpa müalicəsi alır. Tibb müəssisəsinə müraciət edən xəstələrin 40 %-dən çoxunu nevroloji problemləri olan uşaqlar təşkil edir. Bunlar əsasən uşaq serebral iflicli xəstələrdir. Nevroloji problemlərlə gələn uşaqların çoxunda nitq qüsurları da olur. Bunların da müayinə və müalicəsi üçün mərkəzdə loqoped və surdoloqoped kabinetləri mövcuddur".
Uşaqlar arasında nevroloji xəstəliklər nə səbəbdən artır? Mövzu ilə bağlı mütəxəssisə müraciət etdik. Pediatr Aynur Əliyeva bizimlə söhbətində bildirdi ki,
südəmər uşaqların anaları daha çox uşağın davamlı ağlamasından, yuxusunun pozulmasından, davamlı qusma, alt çənənin və əllərinin əsməsindən, əmgəyin qabarması və pulsasiya etməsindən, başın həddən artıq böyük və ya kiçik ölçüdə olmasından şikayət edir: "Övladında bu əlamətləri müşahidə edən valideynlər sahə pediatrı ilə yanaşı, nevroloqla da məsləhətləşməlidir. Bir çox əlamətlər fiziolojidir, heç bir müdaxilə lazım deyil, böyüdükcə keçəcək. Bəzi əlamətlər isə ciddidir, mütləq müdaxilə lazımdır. Uşaq 1 yaşında yerimirsə və bəzi hecaları deyə bilmirsə, oyuncaqlarına adekvat reaksiya verə bilmirsə, mütləq nevroloqa müraciət olunmalıdır".
Həmsöhbətimizin sözlərinə görə, uşaqlarda daha çox müşahidə edilən xəstəliklərdən biri də el arasında "sudoroqa" kimi tanınan qıcolma problemidir. Bu ən təhlükəli nevroloji xəstəliklərdən biridir: "Qıcolma yüksək qızdırma fonunda baş verirsə, bu o qədər qorxulu deyil, sadəcə, sonralar uşağı hərarətdən qorumaq lazımdır. Ancaq qıcolma hərarətsiz olursa, bu artıq ciddi problemdir. Mütləq müayinə edilməli və səbəbi tapılmalıdır. Xüsusilə irsiyyətində epilepsiya xəstəliyi olan valideynlər daha diqqətli olmalıdır".
A.Əliyevanın sözlərinə görə, 1 yaşına qədər uşaqlarda nevroloji problemlər özünü daha tez göstərir: "Uşaqların həddindən çox ağlaması, qəfil diksinməsi, çox qusması, ətrafa reaksiya verməməsi, gözlərin bərəlməsi kimi əlamətlərdən biri və ya bir neçəsi varsa, kəllədaxili təzyiqin olması ehtimalı var və təcili uşaq nevropatoloquna müraciət etmək lazımdır.
Həmçinin, uşaqlarda gözvurma, çiyinatma və s. kimi hərəkətlərin əsas səbəbləri kimi çox zaman qorxu, stress hesab olunur.
Nevroloji uşaqların 90 faizində baş ağrıları hər zaman müşahidə olunur. Belə ki, baş ağrılarının da müxtəlif səbəbləri var. Belə ki, əsasən viral və ya üst tənəffüs yolu infeksiyaları, stress, minor baş zədələri, miqren, təzyiq baş ağrılarına səbəb olur. Baş ağrıları digər əlamətlərlə yanaşı müşahidə edilirsə, uşaqda ağır nevroloji problem ola bilər.
Nevroloji problemi olan uşaqlar vaxtında müalicə olunsa, onlar həyatının sonrakı dövründə daha az fəsadlarla qarşılaşar".
Günel CƏLİLOVA
