Kamran Əsədov: "Müəllimlərin diaqnostik qiymətləndirmənin nəticələrinə görə vəzifəsindən azad edilməsi mümkün deyil"
"Bu günə kimi Təhsil Nazirliyi tərəfindən Azərbaycanda 140 minə yaxın müəllim diaqnostik qiymətləndirmədən keçirilib. Hazırda Bakıda 7 min müəllimin qiymətləndirilməsi aparılır. Bununla da proses tam başa çatacaq". Bunu Təhsil Nazirliyinin mətbuat xidmətinin rəhbəri Cəsarət Valehov mətbuata açıqlamasında deyib. Onun sözlərinə görə, bu işlərin həyata keçirilməsində məqsəd səriştəli təhsil verənlərin hazırlanması və təhsil mühitinə cəlb edilməsidir.
C.Valehovun açıqlamasından məlum olub ki, qiymətləndirmədə kifayət qədər zəif nəticə göstərən müəllimlər məktəblərdən ixtisar olunacaq: "Diaqnostik qiymətləndirmə zamanı zəif nəticə göstərən müəllimlərin bir qismi təlimlərə cəlb edilərək, nəticələrini yaxşılaşdırmaq üçün onlara şans veriləcək. Bununla yanaşı, qiymətləndirmədə kifayət qədər zəif nəticə göstərən müəllimlər var ki, onlar məktəblərdən ixtisar olunacaq. Çünki başqa yol yoxdur. İstəyirik ki, yüksək bilikli, savadlı, bacarıqlı müəllimlər işlə təmin olunsun. Ötən il rekord sayda namizəd işə qəbul üçün müraciət edib, onlardan 30 mini imtahanda iştirak edib. Bu il Azərbaycanda vakansiyaların sayları artırılıb, səriştəli müəllimlərin işə cəlb olunması üçün yeni imkanlar yaradılır".
Nazirlik rəsmisi onu da qeyd edib ki, bu il müəllimlərin işə qəbulu üzrə müsabiqədə kifayət sayda vakant yer olacaq: "Bu il 6 mindən çox vakant müəllim yerinin olması gözlənir. Burada əsas məqsəd daha çox gənc və yüksək savadlı müəllimlərin işə cəlb olunmasıdır".
Maraqlıdır, ekspertlər buna necə yanaşır? Məsələyə münasibət bildirən təhsil sahəsi üzrə ekspert Kamran Əsədov buna fərqli prizmadan yanaşır. Onun sözlərinə görə, diaqnostik qiymətləndirmə attestasiya imtahanı olmadığı üçün, müəllimlərin işdən azad edilməsi düzgün deyil: "Müəllimlərin diaqnostik qiymətləndirmənin nəticələrinə görə vəzifəsindən azad edilməsi mümkün deyil. Buna Əmək Məcəlləsi imkan vermir. Bundan əlavə, əmək müqaviləsinə xitam verilməsinin əsasları və qaydaları var. Müəllimlərin müqaviləsinə xitam verilir, bunun təminatları var. Bu illər ərzində onların fəaliyyətinə şərait yaradan şəxslər də vəzifəsindən azad edilməlidir. Nəticəsi zəif olan müəllimləri təkmilləşdirmə kurslarına cəlb etmək və sonra yenidən imtahan etmək olar, yenə də nəticə zəif olsa, onda hansısa tədbir görmək mümkündür. Həmin müəllimlər həmkarlar ittifaqlarının üzvüdür və buna görə hər ay üzvlük haqqı ödəyirlər. O üzdən, onları birbaşa azad etmək mümkün deyil. Ancaq nəticəsi az olan müəllimlərə çox dərs vermək olmaz. Lakin imkan verək ki, təkmilləşsinlər. Hətta uzun müddət idmanla məşğul olan idmançı da bir müsabiqədə uğur əldə edə bilmir".
Vidadi ORDAHALLI
