"Azercell Telekom" MMC-nin Barama İnnovasiya və Sahibkarlıq Mərkəzinin əməkdaşları "Chevron Xəzər" LTD-nin dəstəyi və "Junior Achievement Azerbaijan"ın təşkilatçılığı ilə "Gələcəyi qur: Məktəblərdə karyeranın planlaşdırılması və inkişafı" layihəsi çərçivəsində məktəblilərə dəstək olub.
Mərkəz əməkdaşları Fidan Tofidi və İradə Məmmədova layihə çərçivəsində məktəblilərlə keçirilən görüşdə iştirak edib. 2016-2017-ci tədris ilində həyata keçirilən "Gələcəyi qur: Məktəblərdə karyeranın planlaşdırılması və inkişafı" layihəsinin yekun mərhələsi olaraq təşkil edilən tədbirin əsas məqsədi əmək bazarında müxtəlif peşə sahələri üzrə mümkün karyera və iş imkanları barədə şagirdləri maarifləndirmək idi. Sözügedən görüşdə Bakı və ətraf rayonlarda yerləşən doqquz ümumtəhsil müəssisəsindən (Neftçi Qurban adına 288 saylı orta məktəb, Əliheydər Kazımov adına 228 saylı orta məktəb, C.Cabbarlı adına 161 saylı tam orta məktəb, Bakı Avropa Liseyi, 49 saylı "İntellekt" məktəb-lisey, 163 saylı tam orta məktəb, 6 nömrəli məktəb-lisey, Elşən Sultanov adına 217 saylı tam orta məktəb, 147 saylı texniki humanitar lisey) layihənin təlimlər mərhələsində fəallığı ilə seçilmiş 110 şagird iştirak edib.
Barama İnnovasiya və Sahibkarlıq Mərkəzinin əməkdaşları proqram iştirakçılarına karyera seçiminin məktəbdə tədrisinin əhəmiyyətindən, incəsənət sahəsində uğurlu karyeranın mümkünlüyündən, müasir əmək bazarında innovasiyaların rolundan danışıb. Barama İnnovasiya Mərkəzinin fəaliyyəti barədə məlumat verərək bildiriblər ki, Azərbaycanda sahibkarlığa dəstək vermək məqsədilə 2009-cu ildə "Azercell" şirkəti tərəfindən yaradılmış bir layihədir. Barama əsasən informasiya texnologiyaları sahəsində fəaliyyət göstərən layihələri və yaranmaqda olan şirkətləri - startupları dəstəkləyərək onların şirkətləşməsinə kömək edir. Barama fəaliyyətdə olduğu 8 il ərzində bir çox uğura imza atıb. Belə ki, mərkəzdə 70-dən çox layihə fəaliyyətə başlayıb, 40-ı uğurla başa çatıb, onlarla şirkət yaranıb.
Görüşün ikinci hissəsində şagirdlərə qrup şəklində hər bir peşəkar ilə Dəyirmi Masa arxasında maraq sahələrinə uyğun müzakirə aparmaq imkanı yaradılıb. Barama İnnovasiya və Sahibkarlıq Mərkəzinin əməkdaşları müzakirələrdə fəallıqları ilə seçilib.
Daha ətraflı məlumat üçün [email protected] ünvanına müraciət edə bilərsiniz.
