Azərbaycan dili dünyanın ən zərif, lətif dillərindən biridir. Bunu ana dilimiz və dövlətimizin dili olduğu üçün demirik. Həqiqətən də Azərbaycan dilini öyrənən əcnəbilərin özləri etiraf edir ki, sizin olduqca gözəl diliniz var. Dilimizin gözəlliyi əcnəbiləri özünə cəlb edir. Zaman vardı ki, Azərbaycan dilini bilməklə xarici səyyahlar bütün Qafqazda rahat, maneəsiz dolaşa, insanlarla ünsiyyət qura bilirdilər.
Azərbaycan dövləti çoxmillətli, çoxmədəniyyətli dövlət kimi dünyada tanınır. Burada hər bir xalq öz ana dilini qorumaqla yanaşı, Azərbaycan dilini də dərindən mənimsəyir və dilimizə böyük sayğı göstərir. Əlbəttə, insan hansı ölkədə yaşayırsa, həmin ölkənin dilini bilməlidir. Bu bir həqiqətdir. Hətta başqa dövlətlərdə bu bir tələb kimi insanların qarşısına qoyulub. Hansısa bir azərbaycanlı başqa dövlətdə yaşayıb işləyirsə, birmənalı olaraq, o dövlətin dilini öyrənir, mədəniyyəti, tarixi ilə maraqlanır. Dil təkcə ünsiyyət vasitəsi deyil, həm də insanları, xalqları, mədəniyyətləri qovuşduran bir məfhumdur. Tolerantlığı, multikultural dəyərlərə səmimi münasibəti ilə seçilən, hətta nümunə olan Azərbaycan xalqı başqa xalqların dilinə, mədəniyyətinə böyük sayğı göstərir, başqa xalqlardan da istəyi, təmənnası budur ki, onlar da bizim ana dilimizi öyrənsin. Azərbaycanda fəaliyyət göstərən bəzi dini icmaların nümayəndələri kütləvi olaraq Azərbaycan dilini öyrənməyə başlayıb. Sözsüz ki, bu olduqca müsbət bir haldır.
Məlum olduğu kimi, xeyli vaxtdır Azərbaycan Respublikasının Prezidenti yanında Bilik Fondu Azərbaycan Respublikasının millətlərarası, multikulturalizm və dini məsələlər üzrə Dövlət müşavirliyinin təşəbbüsü ilə rus pravoslav kilsələrində "Azərbaycan dilini öyrənirik" layihəsini həyata keçirir. Artıq ənənə halını alan bu layihədə iştirak edən insanlar dilimizi dərinliyinə qədər öyrənməyə çalışır.
Bu barədə "Bakı-Xəbər"ə məlumat verən Azərbaycan Respublikasının Prezidenti yanında Bilik Fondunun mətbuat katibi Ceyhun Musaoğlu bildirdi ki, bu layihədə iştirak edənlər dilimizə böyük sevgi ilə yanaşır. O qeyd etdi ki, bir müddət əvvəl "Jen Mironosist" Pravoslav Kafedral Kilsəsində müxtəlif millətlərdən olan rusdilli vətəndaşlarımız üçün Azərbaycan dili kursları açılıb və artıq kursu bitirənlər sertifkatla təmin olunub. C.Musaoğlu dedi ki, Rus Pravoslav Kilsəsinin Bakı-Azərbaycan Yeparxiyasının başçısı Aleksandr ata Bilik Fondunun həyata keçirdiyi bu layihənin Azərbaycanda yaşayan rusdilli əhali arasında geniş yayılacağına rəğbətlə yanaşıb və layihənin uğurla davam etməsinə xeyir-dua verib. Aleksandr ata "Rusdilli əhaliyə Azərbaycan dilini tədris etməklə bu ölkənin multikultural dəyərlərini, tarixini, mədəniyyətini də təbliğ etmiş oluruq" - deyə işin mahiyyətinə dəstək verib. .
Yeparxiyanın başçısı belə kursların Azərbaycanın digər bölgələrində - Gəncədə, Xaçmazda, Sumqayıtda fəaliyyət göstərən kilsələrdə də açılmasını təklif edib. Bu layihənin "Azərbaycan Respublikasında dövlət dili haqqında" Qanundan irəli gəldiyi vurğulanıb.
C.Musaoğlu qeyd etdi ki, artıq başa çatan layihə çərçivəsində Bakı şəhərinin bir neçə kilsəsində həftədə iki dəfə Azərbaycan dili dərsi keçilib. Kilsə əməkdaşlarının da qatıldığı bir neçə bölmədə fəaliyyət göstərən ödənişsiz kurslara ilkin mərhələdə 60-dan çox dinləyici yazılıb və kurs başa çatdıqdan sonra sertifkat alıb.
Həmsöhbətimiz nəzərə çatdırdı ki, xüsusi müsabiqə yolu ilə ali və orta məktəblərin rus bölmələrindən seçilən müəllimlərin əməkhaqları Bilik Fondu tərəfindən ödənilib.
Müsahibimiz vurğuladı ki, multikultural həyat tərzi ilə tanınan Azərbaycanda daimi, yaxud müvəqqəti yaşayan, Azərbaycan dilini öyrənmək arzusunda olanların bu sahədə bilik, bacarıqlarının artırılmasına kömək göstərmək, onlara azərbaycançılıq məfkurəsini, dövlətçilik ruhunu təlqin etmək, tolerantlıq prinsipləri aşılamaq "Azərbaycan dilini öyrənirik" layihəsinin əsas qayəsini təşkil edir. Onun sözlərinə görə, layihənin davamı da olacaq: "Bu layihə artıq ikinci ildir həyata keçirilir. Artıq ikinci layihə başa çatıb. Layihənin iştirakçısı olan rusdilli əhalinin nümayəndələri sertifikatlarla təmin olunub. Bu layihə çərçivəsində onlara yalnız Azərbaycan dilini öyrətmirik. Bu layihəyə cəlb etdiyimiz müəllimlər və "Bilik" Fondunun əməkdaşları onları Azərbaycanın görməli tarixi yerləri ilə tanış edir. Onlar, həmçinin, teatrlara, kinoya, konsertlərə gedir, fondda şairlərlə, yazıçılarla, alimlərlə görüşür. Layihə iştirakçıları bununla Azərbaycanın milli-mədəni həyatı ilə daha yaxından tanış olur. Onlar kursa qəbul olunanda xüsusi imtahatdan keçir. Hətta onlara dərs deyən müəllimlər də imtahandan keçdikdən sonra tədrisə başlayır. Yəni bu layihə uğurla davam edir. Bizim bu sahədə səriştəmiz, təcrübəmiz var".
İradə SARIYEVA
