Könül Vaqifqızı: "14 yaşlı uşaqların adıçəkilən zərərli vərdişdən uzaq durması üçün məktəblərdə siqaret əleyhinə tədbirlər keçirilməlidir"
Azərbaycanda aparılan tədqiqatlar nəticəsində məlum olub ki, siqaret çəkənlərin tərkibi hər il gəncləşir. Təəssüf ki, siqaret çəkənlər arasında məktəbli uşaqlara da rast gəlinir.
Səhiyyə Nazirliyi İctimai Səhiyyə və İslahatlar Mərkəzinin (İSİM) Layihələrin əlaqələndirilməsi şöbəsinin müdiri Səbinə Babazadə "Tütün-inkişaf üçün təhlükə!" mövzusunda KİV nümayəndələri üçün keçirilən seminarda bildirib ki, əvvəllər ölkədə 16-17 yaşlıların tütündən istifadəsi müşahidə olunurdusa, bu gün yaşı 14-dən aşağı olanlar arasında siqaret çəkənlərin sayı artıb. Onun sözlərinə görə, bu da bir çox xəstəliyin yaranmasına səbəb olur. Siqaretdə olan ziyanlı maddələr, müxtəlif boyalar əsasən xərçəngin yaranmasına şərait yaradır.
Şöbə müdiri qeyd edib ki, bunun qarşısını almaq üçün müxtəlif tədbirlər görülür, maarifləndirmə işləri aparılır.
13-14 yaşlarında olan uşaqlar siqaretə daha çox nə səbəbdən meyl edir? Məsələ ilə bağlı ekspertə müraciət etdik.
Psixoloq Könül Vaqifqızı "Bakı-Xəbər"ə açıqlamasında qeyd etdi ki, Azərbaycanda azyaşlı məktəblilər arasında siqaret çəkənlərin sayının ildən-ilə artmasının kökündə məktəbdə siqaret əleyhinə təbliğat işlərinin aparılmaması, məktəblilərin boş vaxtının səmərəli keçməməsi, məktəblilərə müəllim-valideyn nəzarətinin, cəmiyyətdə siqaret çəkən məktəblilərə qarşı qınağın olmaması kimi məsələlər dayanır: "Məktəblilərin siqaretə meyl etməsinin müxtəlif səbəbləri var. Siqaret çəkmək elə bir vərdişdir ki, onu zorla tərgitmək mümkün deyil. Bu, sırf insan iradəsinə bağlı olan bir amildir. Məktəbdə şagirdlərin boş vaxtları səmərəli təşkil olunarsa, zərərli vərdişlər haqqında müxtəlif diskussiyalar aparılarsa, bu zaman məktəbli siqaret çəkməyə vaxt tapmaz. Həmçinin, bu onun siqareti tərgitməsinə səbəb ola bilər. Məktəbli siqaret çəkməyə başlayıbsa, bu, ilk növbədə, özünün, valideynin, məktəbin və cəmiyyətin günahıdır. Hər kəs gərək özü-özünü dərk elədiyi gündən sağlamlığına diqqət yetirsin. Bu halda, o, cəmiyyət üçün yararlı insana çevrilə bilər".
Həmsöhbətimiz təklif edir ki, 14 yaşlı uşaqların adıçəkilən zərərli vərdişdən uzaq durması üçün məktəblərdə siqaret əleyhinə tədbirlər keçirilsin: "İlk növbədə şagirdlər arasında siqaret əleyhinə mübarizəni gücləndirmək üçün müxtəlif idman oyunlarının, intellektual yarışların, rəsm, yazı müsabiqələrinin keçirilməsi kimi məsələlərlə onların asudə vaxtının səmərəli keçməsini təşkil etmək lazımdır. Ancaq bu təkcə məktəb vaxtı olmamalıdır. Dərs saatı bitəndən sonra belə o, vaxtını səmərəli işlərə, intellektual oyunlara sərf etməlidir". Psixoloqun fikrincə, iradəsi zəif olan uşaqlar bütün zərərli vərdişləri daha tez götürür. Bütün bu məsələlərdə yenə də məktəb, valideyn və cəmiyyət birlikdə mübarizə aparmalıdır: "Düşünürəm ki, bütün məsələlərdə olduğu kimi, azyaşlıların məişət narkomaniyasına aludə olmaması üçün cəmiyyətdə düzgün maarifləndirmə işi aparılmalıdır. Bu işdə əsas məsuliyyət vətəndaş cəmiyyətinin üzərinə düşür".
Günel CƏLİLOVA
