Paytaxtımızda və yerlərdə polisin təşkilatçılığı ilə keçirilən narkomaniya ilə mübarizəyə həsr olunmuş maarifləndirici tədbirlərdə dilə gətirilən narahatlıq başadüşüləndir. Çünki həlli vacib məsələlərin sonucunda gəncliyimizin və gələcəyimizin taleyi dayanır.
Onları insanın qanını, canını deyil, həm də psixologiyasını, mənəviyyatını məhv edən, özündən ömürlük asılı vəziyyətə salan düşməndən qorumaq üçün, sözün əsl mənasında, birləşməyimiz çox vacibdir. Bu təkcə daxili işlər orqanlarına DİN rəhbərliyinin tələbi kimi anlaşılmamalıdır, bu həm də qapımızı döyən bəlanın, səssiz ölümün doğmalarımızı, əzizlərimizi bizdən qoparacaq qədər güclü olmasını görüb həyacan təbili çalan, şəxsiyyətin deqradasiyaya uğradığının fərqində olan insanların istəyidir, tələbidir. Daha dəqiq desək, bu, cəmiyyətin öz tələbidir.
Mayın 30-da Sabunçu RPİ-nin təşkilatçılığı ilə Bilgəhdəki şəhid Telman İsgəndərov adına 142 nömrəli məktəbdə "Narkomaniya bəşəriyyətin bəlasıdır" mövzusunda tədbir keçirildi.
"Ağ ölüm"ü vətənimə gətirməyin" şüarı ilə tədbiri açıq elan edən məktəblilər narkomaniyanın neçə-neçə cavan canlara qıydığını hazırladıqları bədii kompozisiya ilə əks etdirdilər. Məktəbin direktoru Gülnaz Abdullayeva rayon rəhbərliyi və polis idarəsi tərəfindən narkomaniya ilə mübarizəyə həsr olunmuş və mütəmadi olaraq keçirilən tədbirlərdən, görülən işlərdən danışdı. Rayon Polis İdarəsinin rəisi, polis polkovniki Eldar İlyasov insan ölümünə yol açan müxtəlif səbəblərdən - müharibələrdən, aclıqdan, təbii fəlakətlərdən söhbət açdı. Ancaq narkomaniyanın təkcə bir nəfəri deyil, yüzlərlə insanı ağuşuna almasını əsl fəlakət adlandırdı və qeyd etdi ki, bu gün ölkəmizdə narkopmaniyaya qarşı çox ciddi mübarizə aparılır və maarifləndirmə tədbirləri həyata keçirilir, narkomanlıq və narkobiznes cəmiyyətin mənəvi, əxlaqi dəyərlərini sarsıdır, sosial-iqtisadi inkişafa mənfi təsir gostərir, insanların həyat və sağlamlığına ciddi təhlükə yaradır və ən əsası, cinayətkarlığın artmasına səbəb olur.
O, son illər ölkəmizdə keçirilən beynəlxalq tədbirlərdən, idman yarışlarından və bu yarışlarda uğur qazanan idmançı gənclərimizdən söhbət açdı. Bildirdi ki, bu gün Azərbaycan sabitlik adası kimi dünyanın diqqət mərkəzindədir və ölkəmizə gələn turistlərin sayının günü-gündən atması bunun bariz nümunəsidir.
E.İlyasov ötən il 934 kiloqram narkotik vasitənin qanunsuz dövriyyədən çıxarılmasına diqqət çəkərək bildirdi ki, hər şey məktəbdə, ailədə öz həllini tapmır və bəla ilə mübarizəyə cəmiyyətin dəstək verməsi ən önəmli şərtlərdəndir. Təbliğat və mübarizə aparatlarının birgəlik nümayiş etdirmələri gəncliyimizi və gələcəyimizi qorumağa yönəlməli, onlara sağlam vərdişləri, məsələn idmanı, yaxşı oxumağı aşılamlıyıq. O, həmçinin rayonda 8 idman kiompleksinin fəaliyyət göstərdiyini və onların qapılarının təmənnasız olaraq gənclərin üzünə açıq olduğunu bildirdi.
Tədbirdə çıxış edən Sabunçu Rayon İcra Hakimiyyəti başçısının I müavini, Rayon İcra Hakimiyyəti başçısı yanında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın sədri Güloğlan Məmmədov, həkim-narkoloq Qalib Məmmədov, Rayon Gənclər və İdman İdarəsinin rəisi Rakif Əliyev yeniyetmə və gənclərin narkomanlıq və digər zərərli vərdişlərdən qorunması istiqamətində aparılan işlər barədə söhbət açaraq gənc nəslin savadlı, vətənpərvər ruhda böyüməsi, sağlam inkişaf etməsi, zərərli vərdişlərdən uzaq olması üçün görülməli işlərdən danışdılar, müntəzəm olaraq maarifləndirici tədbirlərin keçirlməsinin vacibliyini vurğuladılar.
Sonda şagirdləri maraqlandıran suallar cavablandırıldı.
Hafiz Təmirov polis mayoru
