Pərvanə Mustafayeva: "Tək gənclər deyil, eyni zamanda, bütün xanımlar hamiləlikdən necə qorunmaq barədə bilgilər əldə etsə, o zaman qanunsuz abortların sayı azalar"
Azərbaycanda qanunsuz abort etməyə görə daha ağır cəzaların tətbiqi nəzərdə tutulur. Bu məsələ Cinayət Məcəlləsinə təklif edilən dəyişikliklərdə öz əksini tapıb. Məcəllənin 141-ci (Qanunsuz abort etmə) maddəsinə təklif olunan dəyişikliklərə görə, həkim tərəfindən tibb müəssisələrindən kənarda abort etməyə görə cərimə 500 manatdan 1000 manatadək, xüsusi ali tibbi təhsili olmayan şəxs tərəfindən abort etməyə görə 1000 manatdan 1500 manatadək, bu əməllər nəticəsində zərərçəkmiş şəxsin sağlamlığına ehtiyatsızlıqdan ağır zərər vurulduqda isə 2000 manatdan 3000 manatadək məbləğdə müəyyən edilir.
Hazırkı Məcəllədə isə eyni əməllərə görə cərimələr müvafiq olaraq 200 manatadək, 300 manatadək və 300 manatdan 500 manatadək məbləğdə müəyyən edilib.
Məlumat üçün qeyd edək ki, Məcəlləyə təklif edilən dəyişikliklərin Milli Məclisin mayın 31-də keçiriləcək plenar iclasında müzakirəyə çıxarılması nəzərdə tutulur.
Qanunsuz abort edənlərə qarşı cəzaların sərtləşdirilməsini ekspertlər də dəstəkləyir. Onların fikrincə, cərimələrin artması selektiv abortun qarşısını alacaq.
Həkim-ginekoloq Pərvanə Mustafayeva bizimlə söhbətində bildirdi ki, hamiləlik başlayan vaxtdan qadın orqanizmi buna uyğunlaşmağa başlayır: "Hormonal sistemdə bu dəyişikliklər özünü daha çox göstərir. Abort olduqda artıq uşaqlıqda böyüyən canlı yox olur və uşaqlıqda böyüyən canlıya uyğunlaşan hormonlar arasında disbalans yaranır, uzun müddət bu disbalans qalır. Ən birinci hədəf süd vəzi və cinsiyyət orqanlarıdır. Abortun fəsadları isə ümumiyyətlə çoxdur. Abortu daha ağır - ilk hamilə, çəkisi az və əksinə, çəkisi çox olan qadınlar keçirir. Abort steril şəraitdə, profilaktik, antibiotik şərtlərlə və müasir formada ultrasəs altında aparılarsa, ağırlaşmalar minimuma endirilə bilər. Ən pis halda, qadın orqanizmi üçün ölüm təhlükəsi yaranır. Təəssüf ki, bu gün çılpaqlığı ilə etiraf etməliyik ki, artıq Azərbaycan üçün məktəbli, tələbə azyaşlı qızların da hamiləliyinin pozulması faktları xarakterikdir. Nə zaman bu vəziyyətə gəlib çatdığımızı bilməsək də, hər halda, bu acı həqiqətimizdir. Qanunsuz abort edənlərə qarşı cəzaların sərtləşdirilməsi doğru qərardır. Lakin daha yaxşı olar ki, gənc qızlar hamiləlikdən qorunması ilə bağlı məlumatlı olsun. Tək gənclər deyil, eyni zamanda, bütün xanımlar hamiləlikdən necə qorunmaq barədə bilgilər əldə etsə, o zaman qanunsuz abortların sayı azalar".
Günel CƏLİLOVA
