Sahib Məmmədov: "Himayəsində azyaşlı uşaq varsa və işçi işini layiqincə yerinə yetiribsə, həmin şəxsin işdən çıxarılması düzgün deyil"
Azərbaycanda 3 yaşınadək uşağını təkbaşına böyüdənləri işdən çıxaranlar üçün cərimələrin artırılması nəzərdə tutulur. Belə ki, hamilə qadının və ya himayəsində üç yaşınadək uşağı olan qadının, üç yaşınadək uşağını təkbaşına böyüdən kişinin əmək hüquqlarını pozmaya görə cərimələr artırılır. Bu, Cinayət Məcəlləsinə təklif edilən dəyişikliklərdə öz əksini tapıb.
Bu dəyişikliklərə əsasən, qadının hamiləliyinə və ya himayəsində üç yaşınadək uşağı olmasına görə, həmçinin kişi üç yaşınadək uşağını təkbaşına böyütdüyünə görə onunla əmək müqaviləsini əsassız ləğv edənlər 2000 manatdan 3000 manatadək miqdarda cərimələnəcək. Hazırda isə bu cərimənin məbləği 500 manatdan 1000 manatadəkdir.
Himayəsində azyaşlı olan valideynlərin işdən çıxarılması düzgün deyil.
Əmək Hüquqlarının Müdafiə Liqasının sədri Sahib Məmmədov "Bakı-Xəbər"ə açıqlamasında qeyd etdi ki, himayəsində azyaşlı uşağı olan valideynin nə səbəbdən işdən çıxarılması öncə araşdırılmalıdır: "Hər işdən çıxarılan şəxsə görə qarşı tərəfin mühakimə olunması və ya cərimə olunması düzgün deyil. Ola bilər ki, 3 uşağı olan valideyn bilərəkdən işdə olan avadanlıqları sıradan çıxarıb. Təbii ki, o halda, müdir və ya sahibkar həmin işçini işdən çıxarmalıdır. Bu zaman işdən çıxardanın cərimə olunması düzgün deyil. Çünki həmin şəxs iş yerinə müəyyən məbləğdə zərər vurub. Həmçinin, müdirlə işçi arasında şəxsi ədavət olarsa, bu onun işdən çıxarılmasına təsir etməməlidir. Elə etmək lazımdır ki, işçi ilə rəhbər arasında yaşanan şəxsi problem iş prosesinə təsir etməsin".
Həmsöhbətimiz onu da vurğuladı ki, qanun layihəsində təklif edilən dəyişiklik tək tənha analara deyil, eyni zamanda, atalara da şamil olunur: "Elə ailə var ki, uşağın anası rəhmətə gedir və ata təkbaşına körpə uşağını böyütməli olur. Ailənin əsas yükü kişilərin üzərində olur. Rəhbər işçini işdən çıxarmazdan öncə onun ailə durumu ilə bağlı məlumatlı olmalıdır. Onun himayəsində azyaşlı uşaq varsa və işçi işini layiqincə yerinə yetiribsə, həmin şəxsin işdən çıxarılması düzgün deyil. Bu halda, işçini işdən azad edən şəxs qanunun tələbi çərçivəsində cəzalandırılmalıdır".
Günel CƏLİLOVA
