Rəsul Cahangirli: "Ancaq bir şeyi də nəzərə almalıyıq ki, bu, digər ölkənin qərarıdır"
Məlum olduğu kimi, bu il iyulun 1-dən Rusiyada sürücüləri xarici ölkənin sürücülük vəsiqəsi ilə işə götürmək qadağan olunacaq. Bu o deməkdir ki, xarici ölkələrin sürücülük vəsiqələri tanınmayacaq. Bununla bağlı yayılan məlumatda qeyd olunur ki, yeni qayda "Yol hərəkəti qaydalarının təhlükəsizliyi haqqında" Qanuna və "İnzibati qayda pozuntuları haqqında" Məcəlləyə edilmiş dəyişiklik əsasında həyata keçiriləcək.
O da bəlli olub ki, yeni qaydalar avtomobilindən şəxsi məqsədlərlə istifadə edən əcnəbilərə şamil olunmayacaq. Ancaq bundan fərqli olaraq, Rusiyada imtahan verib sürücülük vəsiqəsi almayan, xarici ölkənin sürücülük vəsiqəsindən istifadə edən sürücüləri işə götürənlər 50 min rubl məbləğində cərimə ediləcək. Rusiyada sürücülük fəaliyyətini davam etdirmək niyyətində olan əcnəbilər 2017-ci il iyulun 1-dək yol hərəkəti qaydalarından imtahan verib Rusiya Federasiyasının sürücülük vəsiqəsini almalıdır.
Nəzərə almaq lazımdır ki, Rusiyada minlərlə soydaşımız sürücülük fəaliyyəti ilə məşğul olur. Onların əmək fəaliyyəti məhz sürücülüklə bağlıdır. Digər tərəfdən, Azərbaycandan bu ölkəyə yük aparanlar var. Belə ki, işlə əlaqədar görürsən ki, onların geri qayıtması yubanır və s. Bir aydan sonra sözügedən qadağa qüvvəyə minəcək. Bütün bunlar, heç şübhəsiz ki, orada əmək fəaliyyəti ilə məşğul olan soydaşlarımız üçün problemlər yaradacaq. O üzdən, problemi necə həll etmək olar? Məsələyə münasibət bildirən ekspert Rəsul Cahangirlinin sözlərinə görə, bu, Rusiyanın qərarı olduğu üçün, buna hər hansı bir formada müdaxilə etmək mümkün deyil: "Tək bir ölkəyə qarşı belə bir qərar qəbul olunsaydı, o zaman ikitərəfli danışıqlar aparmaqla problemi hardasa həll etmək mümkün olardı. Söhbət bütün xarici ölkələrdən getdiyi üçün, məsələni həll etmək çox çətindir. Şübhəsiz ki, ilk mərhələdə, bütün digər ölkələrin sürücüləri kimi, azərbaycanlı sürücülər də müəyyən çətinliklərlə üzləşəcək. Ancaq bir müddət keçəndən sonra buna alışacaqlar. Yəni Rusiyada təzədən imtahan verib sürücülük vəsiqəsi alacaqlar. Aydın məsələdir ki, bu, deyildiyi kimi, heç də asan olmayacaq. Ancaq bir şeyi də nəzərə almalıyıq ki, bu, digər ölkənin qərarıdır. Digər tərəfdən, bunun Azərbaycandan Rusiyaya yük, sərnişin daşıyanlara şamil ediləcəyini düşünmürəm. Rusiyada sürücülük fəaliyyətini davam etdirmək niyyətində olan azərbaycanlı sürücülər yol hərəkəti qaydalarından imtahan verib bu ölkənin sürücülük vəsiqəsini almalıdır. Necə ki, digər əcnəbi ölkələrdən olan vətəndaşlar bu addımı atacaq".
Vidadi ORDAHALLI
