Hər bir insan üçün ən vacib olanı can sağlığıdır desək yanılmarıq. Bəzən özümüzə nə qədər qayğı göstərsək də, zərərli vərdişlərdən uzaq dursaq da, təəssüf ki, sağlamlığımız bizi imtahana çəkir. Ancaq yaxşı ki, öz işini yükək səviyyədə bilən həkimlərimiz var.
Bu günlərdə uzun illərdir qəzetimizin hüquq üzrə eksperti kimi çalışan Şəmsəddin Əliyev ürək əməliyyatı keçirib. Hazırda Ş.Əliyevin vəziyyəti yaxşıdır, o, ağır ürək əməliyyatından sonra özünü yaxşı hiss edir. Bu barədə Ş.Əliyev bizimlə söhbətində bildirdi: "Ürəyim məni heç narahat etmirdi. Bilirsiniz ki, mən nə siqaret çəkirəm, nə də spirtli içki qəbul edirəm, bir sözlə, zərərli vərdişlərdən uzağam. Mütəmadi olaraq idmanla məşğul olan, öz sağlamlığımın qeydinə qalan adamam. Heç ağlıma gəlməzdi ki, ürək mənə namərdlik edə bilər. Neçə vaxt idi ki, məndə tənginəfəslik vardı, yeriyəndə, hərəkət edəndə özünü büruzə verirdi. Keçən ilin noyabrında hiss etdim ki, narahatlığım var. Dedim ki, yəqin havaların soyuması ilə əlaqədar bronxlarıma soyuq olub. Əhəmiyyət vermədim. Sonra gördüm ki, bu təkrar olundu, tez-tez tənginəfəs olmağa başladım. Kardiologiya İnstitutuna getdim. Dedilər ki, təcili "anju" olunmalısınız, bu çox ciddi məsələdir. Mərkəzi Klinik Xəstəxanaya üz tutdum. Məlum oldu ki, ürəyimin iki damarı 95 faiz tutulub. Həkim məətəl qaldı ki, siz bu vəziyyətdə necə gəzirsiniz, necə maşın sürürsünüz? Yəni vəziyyətim ağır idi. Mənim ürəyimi Azərbaycan Kardiologiya Cəmiyyətinin sədri, Türk Kardiologiya Cəmiyyətinin vitse-prezidenti, Mərkəzi Klinik Xəstəxananın kardiologiya şöbəsinin müdiri Firdovsi İbrahimov əməliyyat etdi. Deyim ki, çox ağır və çətin əməliyyat idi, doktor sağ olsun, xəstəliyin öhdəsindən gələ bildi. Əməliyyat gözlənilməz dərəcədə uğurlu nəticə verdi. Mayın 18-də əməliyyat olunmuşam. Hazırda evdəyəm, özümü, Allaha şükür, çox yaxşı hiss edirəm, hərəkət edirəm. Əlbəttə, mən Allahın istəyilə ayaqdayam. Sağ olsun doğma "Bakı-Xəbər", məni axtarır, vəziyyətimlə maraqlanır. Hər şey qaydasındadır. İnşallah, görüşərik".
Biz də, öz növbəmizdə, qəzetimizin dostu, sevimlisi, "Polisə Dəstək" İB-nin sədri, sabiq polis polkovniki Şəmsəddin müəllimə Allahdan şəfa diləyir, "tezliklə görüşərik" deyirik!
İradə SARIYEVA
