28 may- Respublika Günü münasibətilə Nəsimi rayonunun orta məktəblərində silsilə tədbirlər keçirilir. Bu gün münasibəti ilə elmi-praktik konfranslar, dəyirmi masalar, inşa yazıları, rəsm, şeir müsabiqələri təşkil edilir, divar qəzetləri buraxılır.
Nəsimi Rayon İcra Haimiyyətindən baki-xeber.com-a verilən məlumata görə, növbəti bayram tədbiri mayın 25-də 159 saylı tam orta məktəbdə baş tutub. Tədbiri giriş sözü ilə məktəbin direktoru Vahid Xəlilov açaraq qonaqları salamlayıb və sözü Nəsimi RİH başçısı Asif Əsgərova verib. Asif Əsgərov bildirib ki, 28 May- Azərbaycan Xalq Cumhuriyyətinin yarandığı gün xalqımızın tarixində ən şərəfli günlərdən biridir. Həmin gün çoxəsrlik tarixi olan Azərbaycanda müstəqil dövlət qurulub. Bu həm də müsəlman dünyasında ilk demokratik dövlət idi. Həmin mürəkkəb dövrdə böyük çətinliklərə və maneələrə baxmayaraq bu dövləti qurmağa nail olmuş insanların əziz xatirəsi daim qəlbimizdə yaşayacaq. Bu dövlət 23 ay yaşasa da, onun dövlətçilik ənənəsi və milli özünüdərk baxımından olduqca böyük əhəmiyyəti vardır. Keçən əsrin 90-cı illərinin əvvəllərində Azərbaycan ikinci dəfə dövlət müstəqilliyini itirmək təhlükəsi ilə üzləşəndə xalqımızın təkidli tələbi ilə ümummilli liderimiz, dahi şəxsiyyət və böyük vətənpərvər Heydər Əliyev hakimiyyətə qayıtdı və xilaskarlıq missiyasını uğurla yerinə yetirdi. Ulu öndərimiz qısa müddət ərzində ölkəmizi məhvə aparan bütün təhlükələri əzmkarlıqla dəf edərək müstəqil Azərbaycan dövlətinin qurucusu və banisi oldu. Bügünkü çiçəklənən, qüdrətli Azərbaycana görə biz hamımız bu dahi insana minnətdarıq. Azərbaycanın hərtərəfli inkişafına yönəlmiş həmin siyasət bu gün Prezident İlham Əliyev tərəfindən uğurla davam etdirilir.
Qonaqlar məktəbin foyesində uşaqların əl işlərindən, rəsm əsərlərindən ibarət sərgiyə və məktəb şagirdlərinin ifasında hazırlanmış konsert proqramına tamaşa edib.
Tədbirdə Bakı şəhəri üzrə Təhsil İdarəsinin məsul əməkdaşları və digər qonaqlar iştirak edib.
